Pjesëmarrja në parlament/ Berisha: Në këtë diktaturë, ne nuk duhet të lëmë asnjë hapësirë bosh nga e cila të mos luftojmë kundër saj

Kreu i PD, Sali Berisha, deklaroi se Shqipëria ndodhet nën një “narkodiktaturë” dhe theksoi se demokratët nuk duhet të heqin dorë nga lufta për votën e lirë.

Berisha u shpreh se situata politike aktuale është një diktaturë që ka uzurpuar pushtetin dhe e quan si një organizatë kriminale.

Ai theksoi se nuk duhet të lëmë asnjë hapësirë bosh dhe se secili anëtar i PD duhet të ribrendojë qëndrimin e tij për të luftuar kundër këtij sistemi.

“Jo, asnjëri prej nesh nuk ka bërë sa mundemi. Tani kërkohet një ndryshim, kërkohet energji e re, forma të reja për të përballuar këtë mal të farsës elektorale”, tha Berisha, duke i bërë thirrje demokratëve që të angazhohen dhe të përdorin të gjitha kapacitetet e tyre për të kthyer shqiptarëve votën e lirë.

Ai shtoi se pjesëmarrja në parlament nuk është kompromis, por një mundësi për të luftuar dhe për t’u kundërvënë uzurpimit të pushtetit nga qeveria e Edi Ramës, duke theksuar se me këtë qeveri zgjedhjet e lira nuk mund të realizohen. 

Pjesë nga deklarata:

Duke kërkuar këtë nga kryesia, unë di se ka një debat të marrim pjesë apo jo në parlament.
Ua them ju personalisht, unë mendoj se në këtë diktaturë, ne nuk duhet të lëmë asnjë hapësirë bosh nga e cila të mos luftojmë kundër saj.
Dhe në qoftë se ka një gjë themelore që kërkohet nga secili prej nesh, kërkohet qëndrimi si do ndryshojmë ne në raport me narkodiktaturën, organizatën kriminale që ka uzurpuar pushtetin.
Cili do jetë qëndrimi ynë i ri.
Secili mund të shohë veten dhe të thotë se unë kam bërë sa kam mundur.
Jo, as unë nuk kam bërë sa kam mundur, asnjëri nuk kemi bërë sa mundemi.
Tani kërkohet një ribrendim, kërkohet një ndryshim para këtij mali të farsës elektorale, beteja jonë kërkon energji të reja, kërkon forca të reja, kërkon forma të reja.
Ua them unë edhe demokratëve që mendojnë se është më mirë të mos futemi në parlament.
Jo, nuk është më mirë.
Në një diktaturë duhet të falënderosh Zotn që të jep mundësi ta luftosh atë. Në diktaturën tjetër, ata që luftonin shkonin para pushkatimit, në kamp përqendrimi.
Në këtë diktaturë e pëson si Salianji, por përsëri nuk mund ta mohojmë se mundësitë për ta luftuar janë dhe kërkon një angazhim dhe përkushtim shumë më të madh nga secili prej nesh.
Kërkon shfrytëzimin e të gjitha kapaciteteve për t’u kthyer shqiptarëve votën e lirë, e cila me Edi Ramën nuk ndodh kurrë.
Me Edi Ramën nuk ka zgjedhje të lira.