Franca zhytet në krizë/ Bie qeveria e Macron, çfarë pritet të ndodhë tani

BILD

Shok i madh në Francë! Qeveria e minorancës e kryeministrit François Bayrou është rrëzuar. Bayrou humbi votëbesimin në Asamblenë Kombëtare franceze me një disfatë të thellë – 364 deputetë votuan kundër tij, vetëm 194 për të. Tani ai duhet t’ia dorëzojë dorëheqjen presidentit Emmanuel Macron. Ndoshta që sonte. Për Macron-in kjo është gjithashtu një humbje e rëndë.

Bayrou e kishte lidhur votëbesimin me masa të forta shkurtesash: pothuajse 44 miliardë euro donte të kursehej vitin e ardhshëm, për të balancuar deficitin buxhetor. Madje, dy ditë pushimi zyrtar do të hiqeshin. Në popullatë kjo hasi në kundërshtim të gjerë.

-Pas dorëheqjes së pritur të kryeministrit të tij, Macron duhet të gjejë shpejt një zëvendësues. Por as kampi i tij qendror, as blloku i majtë dhe as populistët e djathtë të Marine Le Pen nuk kanë shumicë në Asamblenë Kombëtare. Një opsion do të ishin zgjedhjet e parakohshme. Por mbetet e paqartë nëse francezët, pas vetëm një viti, do të votonin ndryshe.

Macron do të duhet gjithashtu të rrezikojë që Le Pen ose aleanca e majtë të fitojnë shumicën absolute – atëherë ai do të detyrohej të caktonte një kryeministër nga radhët e tyre. Kaosi politik do të ishte i plotë. Megjithatë, të majtët duan ta rrëzojnë Macron-in dhe të detyrojnë zgjedhje të parakohshme presidenciale. Edhe kampi i Le Pen-it kërkon zgjedhje ose dorëheqjen e Macron-it.

Kryeministri i dytë i dështuar

Për herë të dytë brenda pak më shumë se një viti, një kryeministër dështon për shkak të situatës politike të paqëndrueshme. Para Bayrou-t, Michel Barnier (74) u tërhoq pas vetëm tre muajsh në detyrë.

Problemi: Franca është e zhytur në borxhe dhe duhet urgjentisht të miratojë një buxhet kursimi për vitin 2026. Nëse kjo nuk arrihet, kërcënon humbja e besimit në tregjet financiare – gjë që do t’i rëndonte edhe më shumë financat e vendit.

Dhe: Në vitin 2027 përfundon mandati i dytë i Macron-it, ai nuk mund të rikandidojë – mbetet ende e paqartë kush do të jetë pasuesi nga kampi i tij. Dy ish-kryeministrave Edouard Philippe (54 vjeç) dhe Gabriel Attal (36 vjeç) u jepen një shans. Por a do të mund të kandidojë e djathta populiste Le Pen, pavarësisht një procesi gjyqësor që po zhvillohet ndaj saj? Ende nuk është e qartë.