'Do marr hak për djalin', Babai i Kristian Kolës: 99% është dora e shtetit, në Shkodër ka vrasës me pagesë

Babai i Kristian Kolës, të riut që u ekzekutua në mënyrë mafioze në Shkodër, ka reaguar me dhimbje dhe revoltë pas vrasjes së të birit, duke hedhur akuza të rënda ndaj institucioneve të rendit dhe duke paralajmëruar vetëgjyqësi nëse drejtësia nuk vepron.

Gjatë një deklarate për mediat, ai tha se i biri ishte një djalë i urtë, i punës dhe pa asnjë konflikt, ndërsa ngjarja, sipas tij, është një tjetër shembull i vrasjeve me pagesë që po bëhen të zakonshme në qytet.

Ai akuzoi policinë e Shkodrës për lidhje të mundshme me autorët dhe kërkoi ndëshkimin e menjëhershëm të tyre. Mes dhimbjes, babai i Kristianit paralajmëroi se do të marrë hak personalisht nëse shteti dështon të veprojë.

Deklarata:

“E kam marrë vesh përmes mediave të huaja, doli pas pune me shokë, ka pirë një kafe. Atentatorët i qëlluan në pabesi. Nuk është rasti i parë në Shkodër që ndodh vrasje me pagesë, por burri të vret ndër sy. Këtu 99% është dora e policisë, e Shtetit që i jep këtyre atentatorëve mundësi me vra me pare.

Djali ka punuar në ndërtim. Nuk ka pasur mundësi të bëjë punë tjetër, se ishte 10 orë në ditë në ndërtim. Unë djalin e kam pas si shok, ka pasur një natyrë të veçantë, ishte i urtë i shoqërueshëm. Nuk është marrë me asnjë aktivitet tjetër. Kur kam shkuar të marr djalin, policia është sjellë si serb. Djalin e kanë rrethuar si qen, prandaj dyshoj se policia e ka një dorë”.

Sipas të atit, 34-vjeçari nuk ka pasur konflikte, ndërsa natën e ngjarjen shoqërohej me një mik.

“Ne si familje nuk kemi pasur asnjë konflikt, as asgjë. Kristiani ka pasur vetëm 1 automjet në emër të tij, nuk ka qenë i martuar, por ka qenë me një vajzë, e cila ka ndejt sa ka dash në shtëpinë tonë, është ndarë pastaj me mirëkuptim. Natën që ndodhi atentati ka qenë me një shok që rri gjithmonë. E vranë, ndejti në tokë për 1 orë, po të kishte ardhur ambulanca më herët ndoshta mund edhe të jetonte”.

Babai i Kristian Kolës paralajmëroi për vetëdrejtësi, nëse nuk zbardhet ngjarja dhe nuk dënohen autorët.

“Unë mendoj për hakmarrje, me më dal ai që më vrau djalin do ta vras, do marr personalisht hak. Do e marr dhe te ata policë që nuk, nuk kam frikë nga askush. Edhe mua mund të më vrasin pas shpine, por frikë nuk kam askush. Duhet të hiqet policia e Shkodrës, me themele, të vendoset një polici tjetër derisa të vihet qetësia. Këtu ekzistojnë njerëz që vrasin me pagesë. Nëse këta shteti nuk mund ti heqë, atëherë të na thotë, se këto bëhen përmes policisë. Nëse nuk e bëjnë të na thonë, po dalim e bëjmë luftë civile ”/TopChanel