Izraeli paralajmëron, njohja e shtetit palestinez nxit 'veprime të njëanshme'

Ministri i Jashtëm i Izraelit e cilësoi “gabim” përpjekjen e fundit ndërkombëtare për të njohur shtetin palestinez dhe paralajmëroi se kjo mund të shkaktojë një reagim të njëanshëm por pa specifikuar.  Deklarata erdhi sot pas raportimeve se Izraeli planifikon të aneksojë pjesë të Bregut Perëndimor.

Disa shtete, përfshirë Francën dhe Britaninë, janë zotuar për ta njohur shtetin palestinez në prag të Asamblesë së Përgjithshme të Kombeve të Bashkuara, e cila mbahet këtë muaj.

Marrëdhëniet francezo-izraelite janë tensionuar dukshëm javëve të fundit, që kur presidenti francez, Emmanuel Macron bëri të ditur se shteti i tij planifikon të jetë mikpritësi i një konference të organizuar bashkë me Arabinë Saudite për të diskutuar në OKB zgjidhjen me dy shtete.

Kryeministri britanik, Keir Starmer deklaroi muajin e kaluar se Britania do ta njohë shtetësinë palestineze nëse Izraeli nuk arrin armëpushim për luftën në Gazë, të nxitur nga sulmet e Hamasit në tokën izraelite në tetor të vitit 2023.

“Shtete si Franca dhe Mbretëria e Bashkuar, që shtynë njohjen e ashtuquajtur, kanë bërë një gabim të madh,” tha ministri i Jashtëm izraelit, Gideon Saar, në një konferencë të përbashkët shtypi me homologun e tij danez, Lars Lokke Rasmussen.

Ai shtoi se zbatimi i këtyre planeve do ta bënte “më të vështirë arritjen e paqes”.

“Kjo do të destabilizojë rajonin. Do ta shtyjë Izraelin të marrë gjithashtu vendime të njëanshme.”

Deklaratat e Saar vijnë pasi Izraeli miratoi një sërë vendbanimesh të reja në Bregun Perëndimor, përfshirë një projekt të madh vetëm lindje të Jerusalemit, i njohur si E1, për të cilin komuniteti ndërkombëtar ka paralajmëruar se kërcënon qëndrueshmërinë e një shteti të ardhshëm palestinez.

Të gjitha vendbanimet izraelite në territoret palestineze të pushtuara konsiderohen të paligjshme sipas së drejtës ndërkombëtare.

Ministri izraelit i Financave nga e djathta ekstreme, Bezalel Smotrich, ka thënë se projekti E1 synon “të varrosë idenë e një shteti palestinez” /France24- Syri.net/