VIDEO/ Serbia merr tri pikë në Letoni mes drithërimash, zbehen shanset e Shqipërisë për vendin e dytë
Serbia arriti një fitore të vështirë, por shumë të rëndësishme në fushën e Letonisë, duke triumfuar me rezultat minimal 0-1. Goli i shënuar në minutën e 12-të nga Vlahovic i mjaftoi ekipit të Dragan Stojkoviç për të marrë fitoren, pavarësisht rezistencës së fortë të vendasve deri në fund.
Takimi nisi me presion të serbëve, të cilët pas një krosimi të saktë gjetën golin e hershëm. Megjithatë, Letonia nuk u dorëzua dhe provoi disa herë të rrezikonte portën e Petrovic. Në minutën e 29-të, Luka Jovic mendoi se kishte dyfishuar shifrat, por goli iu anulua për pozicion jashtë loje.
Në pjesën e dytë, loja mori më shumë intensitet. Portieri Zviedris bëri disa pritje vendimtare, duke i mohuar golin Milenkovic dhe Ilic. Në krahun tjetër, Petrovic tregoi reflekse të shkëlqyera në minutën e 72-të kur ndali një goditje të fortë të Varslavans.
Minutat e fundit sollën emocione të mëdha. Në minutën e 82-të, Pavlovic ishte pranë golit të dytë për Serbinë, por mbrojtja vendase reagoi në kohë. Dhe në kohën shtesë, Letonia pati rastin e artë për të barazuar: Varslavans goditi shtyllën, duke shuar edhe shpresat e fundit të vendasve për pikë.
Me këtë fitore, Serbia ngjitet në kuotën e 7 pikëve, në vendin e dytë, por ka luajtur vetëm tri ndeshje. Shqipëria është e treta me pesë pikë me katër takime të luajtura.