Sllovakia trondit Gjermaninë, Spanja mposht lehtë Bullgarinë, ngec Holanda

Gjermania e Julian Nagelsmann pësoi një humbje të befasishme në fushën e Sllovakisë me rezultaton 2-0 pas një performance të zbehtë dhe plot pasaktësi.

Ndeshja nisi me një paralajmërim të hershëm nga vendasit, kur në minutën e 21-të Leo Sauer rrezikoi seriozisht, por Oliver Baumann reagoi me një pritje të shkëlqyer. Gjermanët u ndëshkuan në minutën e 42-të, kur David Strelec gjeti me një pasim të saktë David Hancko, i cili mposhti portierin me një goditje të ftohtë në këndin e poshtëm për 1-0.

Në pjesën e dytë, Nagelsmann bëri menjëherë zëvendësime, ndërsa Leon Goretzka pati mundësinë e artë për të barazuar në minutën e 48-të. Megjithatë, Martin Dubravka u tregua i pakalueshëm, duke pritur në mënyrë fantastike. Vetëm shtatë minuta më vonë, Sllovakia shënoi golin e dytë. Strelec u shndërrua në protagonist duke lëshuar një goditje të fuqishme drejt trekëndëshit, pa asnjë mundësi reagimi për Baumann.

Pjesa e mbetur e lojës solli përpjekje të pafrytshme nga gjermanët, të cilët nuk arritën të gjejnë ritmin e duhur. Përkundrazi, Sllovakia administroi me qetësi avantazhin dhe siguroi një fitore të madhe përballë një kundërshtari të kalibrit botëror.

Kjo humbje ngre pikëpyetje të mëdha për formacionin e Nagelsmann, ndërsa Sllovakia feston një sukses historik.

Spanja shënoi një tjetër paraqitje bindëse duke mposhtur Bullgarinë 3-0 në transfertë. “La Roja” zgjidhi gjithçka që në pjesën e parë, falë efikasitetit para portës.

Ndeshja u zhbllokua herët, në minutën e 5-të, kur Mikel Oyarzabal u gjend në zonë dhe shënoi me një goditje të saktë pranë shtyllës së majtë. Bullgaria pati mundësinë e artë për të barazuar në minutën e 20-të me Kirilov, por topi u përplas në shtyllë. Vetëm pak minuta më vonë, Marc Cucurella dyfishoi rezultatin me një goditje të fuqishme në këndin e sipërm (30’).

Në minutën e 38-të, Mikel Merino vulosi fitoren me një goditje me kokë pas një këndi të ekzekutuar saktësisht, duke çuar shifrat në 3-0. Pjesa e dytë u shndërrua në një formalitet, me Spanjën që administroi qetësisht avantazhin.

Ndërkohë Holanda barazoi 1-1 me Poloninë në shtëpi. Golit të Dumfries në pjesën e parë iu kundërpërgjigj Cash në 10 minuta para fundit të kohës së rregullt.