‘Do jetojmë 150 vite’/ Eksperti amerikan ‘rrëzon’ shpresat e Putinit dhe Jinping për pavdekësinë

Nga Emma Bussey, FOX NEWS

Presidenti rus Vladimir Putin dhe lideri kinez Xi Jinping u kapën duke bërë komente me mikrofon të hapur në Pekin, ku sugjeronin se transplantet e organeve mund të ndihmonin njerëzit të jetonin deri në 150 vjet – një ide që një ekspert amerikan i transplantimeve e quajti pa bazë.

Pasi Reuters regjistroi këtë dialog të çuditshëm, kirurgu i transplantit, Dr. James Markmann, tha për Fox News Digital se Putin dhe Xi duhet të flisnin më shumë për etikën dhe qasjen në organet njerëzore, sesa për jetëgjatësi ekstreme.

Ky bisedë e pazakontë ndodhi teksa dy liderët po ecnin përkrah Kim Jong Un gjatë një parade ushtarake për të shënuar 80-vjetorin e përfundimit të Luftës së Dytë Botërore në Sheshin Tiananmen. Teksa ata lëviznin drejt skenës për të parë spektaklin, përkthyesi i Putinit dëgjohej duke thënë: "Bioteknologjia po zhvillohet vazhdimisht".

Ai më pas shpjegoi pikëpamjen e presidentit rus: “Organet njerëzore mund të transplantohen vazhdimisht. Sa më gjatë jetoni, aq më të rinj bëheni, dhe madje mund të arrini pavdekësinë”.

Xi, i cili nuk ishte para kamerave në atë moment, dëgjohet duke thënë në kineze: “Disa parashikojnë se në këtë shekull njerëzit mund të jetojnë deri në 150 vjet”.

Megjithatë, Dr. Markmann, President i Këshillit Ekzekutiv të Shoqatës Amerikane të Kirurgëve të Transplantit, theksoi se këto përfundime nuk kanë bazë shkencore: “Transplantimi i organeve vitale është një procedurë që shpëton jetë dhe zgjat jetën për pacientët me dështim organik. Por nuk ka asnjë provë shkencore që kjo promovon pavdekësinë, as që njerëzit mund të arrijnë realisht 150 vjet jetë përmes transplantimeve”.

Më vonë, Putini i konfirmoi gazetarëve në Kinë se dy liderët në fakt po diskutonin shkencën e jetëgjatësisë dhe përparimet e ardhshme mjekësore. Ai ka treguar interes për kërkimin kundër plakjes edhe më parë: në 2024 urdhëroi krijimin e institutit shtetëror ‘New Health Preservation Technologies’, i fokusuar në rigjenerimin qelizor, neuroteknologjinë dhe rinovimin e organeve. Bija e tij, endokrinologia Maria Vorontsova, ka marrë gjithashtu grante shtetërore për rigjenerimin qelizor dhe kërkime gjenetike.

Xi ka qenë më pak i lidhur drejtpërdrejt me projektet e jetëgjatësisë, por Pekini ka pozicionuar bioteknologjinë si një shtyllë qendrore të rritjes ekonomike dhe strategjike të Kinës.

Dr. Markmann përfundoi duke rikujtuar realitetin: “Unë nuk do të komentoj mbi mendimet private të liderëve botërorë, por duhet të kujtojmë se mbi 100.000 individë në Shtetet e Bashkuara po presin aktualisht transplantet e organeve që u shpëtojnë jetën. Çështja etike nuk është pavdekësia, por barazia, qasja dhe sigurimi që organet të shpëtojnë jetë sot”.