Telefonat e palosshëm: A do të jetë viti 2026 pika e kthesës për industrinë e telefonisë celulare?

Me Apple që do të bashkohet me trendin vitin e ardhshëm, ekspertët parashikojnë që telefonat e palosshëm do të përbëjnë 10% të tregut premium të telefonave celularë në Evropë deri në vitin 2028. Aktualisht, ky segment përbën vetëm 2% të shitjeve totale, por vitet e fundit ka shënuar rritje të shpejtë, me një rritje prej 37% në vitin 2024, sipas një raporti të Counterpoint.

Konkurrentë si Samsung, Google dhe Honor e kanë dominuar deri tani këtë sektor, me format më të njohura të tipit “libër” që panë rritje me 60% vitin e kaluar. Por ardhja e Apple në vitin 2026 shihet si pika e kthesës për industrinë, duke nxitur një adoptim më të gjerë të teknologjisë së palosshme.

Edhe pse çmimet e pajisjeve premium të palosshme fillojnë nga 1,300 euro, ekspertët thonë se interesimi i konsumatorëve pritet të rritet falë opsioneve të reja blerjeje, si shkëmbimi i telefonave të vjetër dhe tregu i dorës së dytë. “Nëse një produkt kushton mbi një mijë euro, por mund të sjellësh të vjetrin dhe të marrësh një zbritje 30-40%, pse të mos e bësh?”, shpjegon Daniel Hernandez Ortega nga Telefónica.

Megjithatë, sfidat nuk mungojnë. Tregu europian është tashmë i ngopur, me mbi 795 milionë lidhje SIM dhe cikle rinovimi që zgjasin tre deri në katër vjet. Po ashtu, faktorë si politikat tregtare dhe ndërgjegjësimi mjedisor mund të ndikojnë ndjeshëm në ecurinë e industrisë.

Pavarësisht këtyre pengesave, telefonat e palosshëm mbeten një nga segmentet më premtuese të teknologjisë mobile, me parashikime që shitjet e tyre të arrijnë deri në 4 milionë njësi në vit në Evropë deri në vitin 2028.