Parada e fuqisë në Pekin: Xi Jinping në qendër të vëmendjes me Putinin dhe Kim Jong Un në krah, forcohen masat e sigurisë

Skena është gati në zemër të Pekinit për një shfaqje madhështore fuqie dhe force ushtarake, e organizuar nga presidenti Xi Jinping.

Tetë flamuj të mëdhenj të Kinës valviten anash portretit të Mao Zedong, themeluesit të Kinës komuniste, që ndodhet mbi Portën e Paqes Qiellore dhe sheh nga Sheshi Tiananmen një nga sheshet më të mëdha publike në botë.

Poshtë tyre janë radhitur vendet për 26 krerë shtetesh të huaja, përfshirë presidentin rus Vladimir Putin dhe udhëheqësin e Koresë së Veriut Kim Jong Un, prania e të cilëve konsiderohet një fitore diplomatike për Xi-n.

Përballë sheshit, pranë Sallës së Madhe të Popullit, janë ngritur dy struktura të mëdha me lule, që përkujtojnë përfundimin e Luftës së Dytë Botërore, krahas një zone të rezervuar për rreth 50,000 të ftuar.

Të hënën, në ditën e fundit të përgatitjeve, rruga me shumë korsi Chang’an, që kalon përmes sheshit, ishte sërish e hapur për publikun. Shoferët dhe çiklistët ngrinin telefonat lart për të kapur pamje nga skena.

Ky parakalim shënon zyrtarisht 80-vjetorin e dorëzimit të Japonisë në luftë, dhe fitoren e Kinës ndaj pushtuesit. Por për presidentin Xi, kjo ngjarje është shumë më tepër se kaq.

Kjo është një javë e rëndësishme për të, me shumë "herë të para". Ai arriti të tërheqë kryeministrin indian Narendra Modi për një vizitë në Kinë për herë të parë pas shtatë vitesh, duke rikthyer në fokus një marrëdhënie kyçe ekonomike dhe strategjike.

Më shumë se 20 liderë botërorë morën pjesë në samitin e Organizatës së Bashkëpunimit të Shangait (SCO), i cili përfundoi së fundmi – takimi më i madh ndonjëherë i këtij formati.

Po ashtu, për herë të parë që nga viti 1959, një lider i Koresë së Veriut do të marrë pjesë në një paradë ushtarake kineze. Xi po përjeton momentin e tij në qendër të vëmendjes.

Samiti i SCO në Tianjin i dha mundësinë atij të projektojë forcë dhe të ofrojë një vizion për një rend të ri botëror që sfidon Shtetet e Bashkuara. Tani vëmendja është përqendruar te parada në Pekin, e cila do të tregojë aftësitë në rritje të Kinës për të rivalizuar SHBA-në në çdo konflikt të mundshëm.

Liderët e Iranit, Malajzisë, Mianmarit, Mongolisë, Zimbabvesë dhe vendeve të Azisë Qendrore do të jenë të pranishëm për të parë formacionet ushtarake dhe për të parë për herë të parë armë të reja hipersonike dhe drone nënujore pa pilot, sipas autoriteteve kineze. Të vetmit liderë nga Perëndimi në listën e të ftuarve janë nga Serbia dhe Sllovakia.

Prania e Kim Jong Un është një shtesë e papritur u njoftua vetëm në fund të javës së kaluar dhe treni i tij i blinduar, i shoqëruar nga autokolona dhe truproja, do të shtojë spektaklin.

Pranë Xi-t pritet të qëndrojnë si Kim, ashtu edhe Putin, gjë që me siguri do të nxisë tituj në mediat perëndimore dhe analiza që i përshkruajnë ata si "boshti i trazirave".

Ndërsa parada është një shfaqje e fuqisë së Kinës dhe ndikimit të Xi-t si lider botëror, ajo mbart edhe një mesazh të qartë të brendshëm: krenari dhe patriotizëm. Kina e përshkruan Luftën e Dytë Botërore si "lufta e popullit kundër agresionit japonez", ndonëse një pjesë e madhe e rezistencës ishte nga nacionalistët që më vonë humbën luftën civile ndaj forcave të Mao-s – dhe janë fshirë kryesisht nga kujtesa kombëtare.

Në prag të përvjetorit, janë publikuar disa filma që trajtojnë këtë betejë, disa prej të cilëve kanë qenë shumë të suksesshëm në kinema. Media shtetërore ka publikuar raportime për të "kultivuar një perceptim të drejtë të historisë së Luftës së Dytë Botërore".

Kjo fushatë ka shkaktuar tensione me Japoninë. Javën e kaluar, Pekini dorëzoi një protestë zyrtare ndaj Tokios për raportimet se Japonia kishte kërkuar nga qeveritë evropiane dhe aziatike të mos merrnin pjesë në paradë.

E gjithë kjo duket të jetë pjesë e një përpjekjeje për të mobilizuar opinionin publik kombëtar, në një kohë kur Kina po përballet me një ekonomi të dobët, papunësi të lartë të të rinjve dhe rënie të çmimeve të pasurive të paluajtshme. Kërkesa është e ulët dhe të dhënat më të fundit tregojnë se tarifat e Trump-it po ndikojnë në uljen e prodhimit të fabrikave. Ndërkohë, fushata "kundër korrupsionit" vazhdon, me raportime për hetime ndaj zyrtarëve të lartë.

Ka pakënaqësi, madje zhgënjim, sidomos tek të rinjtë, dhe kjo ndjesi është ndjerë, edhe në internetin e kontrolluar rreptësisht në Kinë. Frika se kjo mund të shpërthejë edhe në jetën reale është një nga arsyet e përgatitjeve jashtëzakonisht të kujdesshme, që janë kthyer në një demonstrim të kontrollit të Partisë mbi një kryeqytet me më shumë se 21 milionë banorë. Qyteti është bërë më i qetë teksa afrohet dita e paradës.

Skanerë të sigurisë janë vendosur në hyrjet e disa ndërtesave zyrtare. Të gjitha dronët janë ndaluar dhe gazetarët ndërkombëtarë janë vizituar në shtëpi – disa prej tyre disa herë – për t'u siguruar se kanë kuptuar mesazhin.

Roje janë vendosur 24 orë në ditë në hyrjet e mbikalimeve dhe urave për të parandaluar çdo protestë – disa prej tyre të veshur me uniforma ushtarake.

Tre vite më parë, kur Partia zgjodhi Xi-n për një mandat të tretë historik, një protestues shpalosi një pankartë mbi një urë autostrade duke kritikuar Xi-n dhe duke kërkuar largimin e tij. Ai u arrestua menjëherë dhe ende nuk dihet se çfarë ka ndodhur me të.

Por ky është një moment që Partia nuk dëshiron ta përsërisë.

Zyrtarët e Partisë Komuniste kanë kaluar muaj të tërë duke planifikuar dhe përgatitur paradën e tyre të parë ushtarake pas gjashtë vitesh. Më shumë se 200,000 flamuj janë vendosur në të gjithë kryeqytetin.

Dekorime të tjera me lule që portretizojnë luftën e Kinës kundër Japonisë janë vendosur në rrugë dhe rrethrrotullime kryesore. Ka edhe një ndriçim të ri të qytetit për ndërtesat në zonën e biznesit.

Zyrtarët nga Zyra Komanduese e Paradës kanë deklaruar se “parimi kryesor është të shmanget sa më shumë shqetësimi për publikun”.

Por për banorët e Pekinit, parada ua ka përmbysur përditshmërinë.

Tanke janë dëgjuar duke kaluar gjatë provave javore natën vonë, dhe zhurma e marshimeve është dëgjuar shumë larg rrugës së paradës.

Banorëve pranë rrugës Chang’an, që të çon në Sheshin Tiananmen, u është thënë të mos dalin në ballkone, për të ruajtur fshehtësinë e provave.

Shkollat, bizneset dhe hotelet përgjatë rrugës së paradës do të qëndrojnë të mbyllura për dy ditët e ardhshme. Ka devijime të shumta rrugore