Izraeli reagon ashpër ndaj përjashtimit të zyrtarëve të tij nga një ekspozitë ndërkombëtare në Londër
Zyrtarët izraelitë nuk do të ftohen në Ekspozitën Ndërkombëtare të Mbrojtjes dhe Sigurisë DSEI në Londër, njoftoi sot qeveria britanike, megjithëse kompanitë izraelite do të lejohen të marrin pjesë në të, një vendim që shkaktoi reagim të fortë nga Izraeli.
"Vendimi i qeverisë izraelite për të intensifikuar operacionet ushtarake në Gaza është i gabuar. Si pasojë, mund të konfirmojmë se asnjë delegacion qeveritar izraelit nuk do të ftohet të marrë pjesë në DSEI UK 2025", deklaroi një zëdhënës i Ministrisë Britanike të Mbrojtjes.
"Duhet të gjendet një zgjidhje diplomatike për t’i dhënë fund kësaj lufte tani, me një armëpushim të menjëhershëm, kthimin e pengjeve dhe rritjen e ndihmës humanitare që i ofrohet popullit të Gazës", shtoi ai.
Qeveria e kryeministrit britanik, Keir Starmer, njoftoi në korrik se do ta njohë shtetin palestinez nëse Izraeli nuk merr masa për të lehtësuar vuajtjet e palestinezëve në Rripin e Gazës dhe nëse nuk respekton angazhime të tjera, një vendim që shkaktoi zemërimin e qeverisë izraelite.
Nga ana e saj, Ministria e Mbrojtjes së Izraelit foli për "diskriminim".
"Këto kufizime përbëjnë një veprim të qëllimshëm dhe të trishtë ndaj përfaqësuesve të Izraelit", theksoi ministria në një deklaratë, duke shtuar se do ta tërheqë stendën e saj nga panairi ndërkombëtar.
Po ashtu, Ministria izraelite e Mbrojtjes vlerësoi se vendimi i Londrës fut motive politike krejtësisht të papërshtatshme në një panair profesional të industrisë së mbrojtjes.
Kompanitë izraelite të mbrojtjes, si Elbit Systems, Rafael, IAI dhe Uvision, do të lejohen të marrin pjesë në DSEI, që do të mbahet në fillim të shtatorit.
Lëvizja e Britanisë ndjek një vendim të ngjashëm të Francës. Tre muaj më parë, Franca mbuloi me perde të zeza stendat e kompanive izraelite të mbrojtjes që morën pjesë në Paris Air Show, pasi ato refuzuan të largonin armët nga ekspozita, veprim që shkaktoi reagim të ashpër nga Izraeli.
Panairi DSEI organizohet çdo dy vjet nga kompania private Clarion Defence and Security, por mbështetet nga qeveria britanike dhe ushtria. Këtë vit, ekspozita katërditore nis më 9 shtator.