FIER/ Po transportonin karburant kontrabandë, arrestohen dy persona në Fier, një tjetër në kërkim

Dy persona janë vënë në pranga dhe një i tretë është shpallur në kërkim nga Policia e Fierit, pas zbulimit të një rasti kontrabande me karburant të transportuar me autobot.

Operacioni u zhvillua nga Seksioni për Hetimin e Krimeve Ekonomiko-Financiare dhe u kodua me emrin “Liquid”.

Në kuadër të këtij operacioni u arrestuan shtetasit Blertian Dulaj, 49 vjeç, dhe Mario Margilaj, 58 vjeç, të dy banues në Fier.

Në kërkim është shpallur shtetasi E. R., 34 vjeç, i dyshuar si bashkëpunëtor në këtë veprimtari të paligjshme.

Operacioni çoi në sekuestrimin e autobotit dhe të lëndës hidrokarbure që transportohej, të cilat do shërbejnë si prova materiale në vijim të hetimit.

Fier

Finalizohet operacioni policor i koduar “Liquid”. Goditet 1 rast në fushën e kontrabandës së mallrave.  

Magazinonin dhe tregtonin lëndë hidrokarbure të dyshuara të kontrabanduara, vihen në pranga 2 shtetas, shpallet në kërkim 1 tjetër.  

Specialistët e Seksionit për Hetimin e Krimeve Ekonomiko-Financiare të DVP Fier, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, bazuar dhe në informacionet e marra në rrugë policore, organizuan dhe finalizuan operacionin policor të koduar “Liquid”. 

Gjatë operacionit, shërbimet e Policisë kanë ndaluar në aksin rrugor "Fier-Mbrostar", autobotin me drejtues shtetasin B. D., i cili po transportonte lëndë hidrokarbure, të pashoqëruar me dokumentacionin përkatës. 

Nga veprimet hetimore rezultoi se autoboti ishte ngarkuar me lëndë hidrokarbure në një ambient në pronësi të shtetasit M. M. dhe se do të magazinohej në një ambient në pronësi të shtetasit E. R.   

Në përfundim të veprimeve: 
-u arrestuan në flagrancë shtetasit B. D., 49 vjeç, banues në Patos dhe M. M., 58 vjeç, banues në Fier;  
-u shpall në kërkim shtetasi E. R., 34 vjeç, banues në Fier. 

Autoboti dhe lënda hidrokarbure u sekuestruan në cilësinë e provës materiale. 

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprat penale "Tregtimi dhe transportimi i mallrave kontrabandë", "Ruajtja dhe magazinimi i mallrave kontrabandë" dhe "Fshehja e të ardhurave".   

#angazhimpërkushtimsakrificë
#tëvendosurkundërkrimit
#nëçdoskajtëvendit🇦🇱
#nëshërbimtëqytetarëve