Nga i përjashtuar në elitë, në fazën e kampionatit të Champions-it: historia e jashtëzakonshme e Bodø/Glimt

Ka histori sportive që duket sikur i përkasin një filmi fantastiko-shkencor. Njëra prej tyre është ajo e Bodø/Glimt, klub norvegjez që ndodhet brenda rrethit polar arktik dhe që këtë sezon do të luajë për herë të parë në Champions League, pas triumfit ndaj Sturm Graz (6-2 në total).

Bodø është një qytet i vogël me vetëm 55 mijë banorë, ku dimrat ofrojnë vetëm dy orë dritë në ditë dhe temperaturat mesatare shkojnë deri në -4°C. Për vite me radhë, këto kushte ekstreme bënë që skuadra të mos lejohej të luante në elitën norvegjeze: deri më 1971 ekipet e tjera nuk pranonin të udhëtonin kaq larg për t’u përballur me ta. Vetëm me përmirësimin e komunikimeve dhe transportit ajror u hoq kjo pengesë.

Megjithatë, sukseset e vërteta erdhën vetëm pas 2018-s, kur Kjetil Knutsen mori drejtimin e ekipit. Që prej atëherë, Bodø/Glimt ka fituar katër kampionate norvegjeze, ka turpëruar Romën e Mourinho-s me një 6-1 historik, ka arritur deri në gjysmëfinalet e Europa League dhe sot shkruan historinë me pjesëmarrjen në grupet e Champions League, duke u bërë ekipi më verior në historinë e këtij kompeticioni.

Sekreti i këtij rrugëtimi? Një filozofi unike, siç shpjegon drejtori ekzekutiv i klubit, Frode Thomassen:

“Suksesi ynë bazohet te vlerat dhe kultura jonë. Nuk flasim për objektiva si tituj apo Champions League. Synimi ynë është të jemi më të mirë nesër se sot.”

Ky mentalitet i ka çuar norvegjezët në elitën evropiane. Dhe tani, kush e di? Ndoshta Real Madridi, Barcelona apo PSG do të duhet të përballojnë jo vetëm lojën e fortë të Bodø/Glimt, por edhe të ftohtin e Arktikut, aty ku pikët nuk falen kurrë.