U zgjodh sot kryetar i Kuvendit të Kosovës, Dimal Basha dikur ka qenë futbollist

Dimal Basha u zgjodh sot kryetar i Kuvendit të Kosovës, duke marrë një prej pozitave më të rëndësishme politike në vend.

Por, e kaluara e tij është e lidhur ngushtë me sportin, e në veçanti me futbollin.

Sot (e martë), deputetët e Kuvendit të Kosovës votuan Dimal Bashën si kryetar të ri, me 73 vota për 30 kundër dhe 3 abstenuan.

Në të kaluarën, Basha ka treguar një lidhje të veçantë me sportin, sidomos me futbollin.

45-vjeçari ka qenë pjesë e ekipeve rinore të FC Ferizajt, ku ka kultivuar disiplinën, punën ekipore dhe përkushtimin.

Edhe pse karrierën sportive nuk e ka vazhduar në nivel profesionist, ai shpesh e përmend si periudhë formuese për karakterin e tij.

Megjithatë, Basha vazhdon të luajë futboll së bashku me veteranët e Ferizajt dhe jo rrallëherë ka fituar trofe.

Si fans i madh i futbollit, Basha vazhdon të ndjekë nga afër ndeshjet e Superligës së Kosovës dhe ndërkombëtare, duke qenë një mbështetës i zjarrtë i talenteve të rinj.

Ai shprehet shpesh se sporti është mësues i shkëlqyer i lidershipit dhe menaxhimit të presionit, dy aftësi të cilat ia kërkon edhe detyra e tij e re politike.

Basha vazhdimisht poston edhe fotografi me futbollistë të ndryshëm shqiptarë, por edhe duke ndjekur ndeshje futbollit nga stadiumi apo televizori.

Dimal Basha gjithashtu njihet si fans i madh i klubit anglez, Tottenham Hotspur.