Sulmi ndaj 'Nord Stream': Çfarë dinte presidenti i Ukrainës, Zelensky?

BILD

Të premten, i lidhur me pranga, i dyshuari për sabotimin e tubacionit, ukrainasi Serhii K. (49 vjeç), u paraqit para gjykatësit hetues. Gjatë paraqitjes, ai formoi me gishtat e tij një trident – simboli kombëtar i Ukrainës.

Ky gjest ka nxitur më tej spekulimet!

Që nga 26 shtatori 2022, kur disa shpërthime tronditën Detin Baltik dhe shkatërruan tre nga katër degët e tubacionit Nord Stream, është spekuluar vazhdimisht: A është Ukraina përgjegjëse për sulmin ndaj Nord Stream apo ka qenë një urdhër nga Kievi?

Deri më tani, nuk ka prova zyrtare që e lidhin Ukrainën si shtet me këtë akt. Megjithatë, ekzistojnë të dhëna që sugjerojnë një përfshirje të mundshme të qeverisë ukrainase.

Këto hipoteza janë në qarkullim:

Në fillim, të gjithë fajësuan Rusinë për shpërthimet. Por shumë shpejt nisën të dalin edhe pista të tjera që tregonin drejt Ukrainës.

Revista “Der Spiegel” raportoi që vitin e kaluar se një “komando sekret ukrainas” kishte marrë me qira një jaht në Rostock, dhe nga aty, zhytës të trajnuar kishin vendosur mina shpërthyese në degët e tubacionit Nord Stream. Të paktën njëri prej zhytësve, Woldomyr S., ishte shtetas ukrainas. Thuhet se ai ka qenë edhe personi që e ka çuar ekuipazhin me gomone në jaht, në natën e 8 shtatorit.

Paratë për jahtin, sipas këtyre raportimeve, janë transferuar nga një kompani guaskë polake me emrin ‘Feeria Lwowa’, pas së cilës, sipas ARD, ‘Süddeutsche Zeitung’ dhe ‘Die Zeit’, qëndron një biznesmen ukrainas me emrin Rustem A.

Sipas raportimeve të gazetës amerikane ‘Wall Street Journal’, një grup i vogël ushtarakësh dhe biznesmenësh ukrainas kanë planifikuar aktin e sabotimit të tubacionit Nord Stream gjatë një mbrëmjeje të shoqëruar me alkool, me qëllimin për të dobësuar Rusinë.

Sipas burimeve të gazetës, presidenti ukrainas Volodymyr Zelensky është informuar vetëm në një fazë të vonshme për këtë operacion dhe, nën presion nga SHBA, ka urdhëruar ndërprerjen e tij. Megjithatë, sulmi është kryer pavarësisht urdhrit, thuhet se është udhëhequr nga Valeri Zaluschny (52 vjeç), që në atë kohë ishte komandant i përgjithshëm i ushtrisë ukrainase.

Sipas ‘Der Spiegel’, një tjetër person i përfshirë në këtë operacion ka qenë Roman Tschervinskyj, ish-drejtor në shërbimin e kundërzbulimit të SBU-së (shërbimi sekret i brendshëm i Ukrainës).

Kjo është përgjigjja e Kievit:

Presidenti ukrainas Volodymyr Zelensky i ka hedhur poshtë në mënyrë të përsëritur dhe të vendosur akuzat për përfshirje në sabotimin e gazsjellësit Nord Stream. Ai ka deklaruar:

“Kievi nuk kishte dijeni për asnjë plan për të shpërthyer tubacionet e gazit Nord Stream,” dhe shtoi: “Asgjë e tillë nuk është bërë nga Ukraina. Unë kurrë nuk do të veproja në atë mënyrë”.

Në një deklaratë tjetër, ai theksoi: “Unë jam president dhe jap urdhra përkatës. Asgjë e tillë nuk është ndërmarrë nga Ukraina”.

Zelensky dyshon se akuzat po qarkullojnë qëllimisht për të dobësuar mbështetjen ndërkombëtare për Ukrainën.

Nga ana tjetër, autoritetet ukrainase nuk kanë dhënë ndonjë koment zyrtar për gazetën BILD të enjten dhe të premten, me arsyetimin se procedura ligjore për rastin është ende në zhvillim.