Pse Kina po i kthen shpinën gjigantit të çipave të inteligjencës artificiale, Nvidia?

Autoritetet kineze thuhet se u kanë kërkuar kompanive teknologjike vendase, përfshirë gjigantët Tencent dhe ByteDance, të ndalojnë blerjen e çipave të Nvidia-s për shkak të shqetësimeve të dyshuara për sigurinë. Paralelisht, Nvidia u ka thënë disa furnizuesve, përfshirë Amkor Technology në Arizona dhe Samsung Electronics në Korenë e Jugut, që të ndalojnë prodhimin e çipit H20, një model i krijuar posaçërisht për tregun kinez, sipas raportit të “The Information”.

Ky zhvillim vjen pas ndalimit nga SHBA, në prill, të shitjes së çipit më të fuqishëm të Nvidia-s, Blackwell, drejt Kinës, duke e arsyetuar me mbrojtjen e sigurisë kombëtare dhe ekonomike. Autoritetet kineze, ndërkohë, kanë ngritur dyshime se çipat H20 mund të kenë “funksione të fshehta gjurmimi” ose të fiken nga distanca, akuza të cilat Nvidia i ka mohuar.

CEO i kompanisë, Jensen Huang, deklaroi se Kina kishte pyetur për ekzistencën e “dyerve të pasme” të sigurisë, të cilat kompania i hodhi poshtë, duke theksuar se është në dialog të vazhdueshëm me autoritetet. Huang gjithashtu njoftoi se Nvidia po zhvillon një produkt të ri të personalizuar për qendrat e të dhënave të inteligjencës artificiale në Kinë, por theksoi se aprovimi i tij varet nga administrata amerikane.

Rregullatorët kinezë kanë shtuar presionet ndaj Nvidia-s, ndërsa Pekini po përpiqet të forcojë sovranitetin teknologjik përmes zhvillimit të çipave vendas, me kompani si Huawei që kërkojnë të rivalizojnë dominimin e Nvidia-s në tregun global të inteligjencës artificiale.