‘Spotify Camp Nou’, ende kantier ndërtimi, shqetësohet UEFA

Në Barcelonë po punohet me ritme të larta për të përfunduar punimet në ‘Spotify Camp Nou’, teksa klubi ‘blaugrana’ është në garë me kohën për të marrë Certifikatën e Përfundimit të Punimeve (CFO). Ky dokument është thelbësor për ta paraqitur më pas në Komunën e Barcelonës, e cila vendos për lëshimin e Licencës së Parë të Përdorimit.

Sipas medieve spanjolle, nesër, më 21 gusht, UEFA do të vizitojë kantierin e stadiumit për të inspektuar gjendjen aktuale të punimeve. Vetëm pak ditë më parë, edhe përfaqësues të La Liga-s kryen një kontroll të hollësishëm në impiant.

Situata është mjaft delikate, pasi vetëm tri javë ndajnë Barcelonën nga ndeshja e parë zyrtare në shtëpi, kundër Valencias, më 13 ose 14 shtator. Megjithatë, ekziston pasiguri e madhe për vendin e zhvillimit të sfidës. Opsioni alternativ, ‘Estadi Olímpic i Montjuïc’, nuk do të jetë i disponueshëm, pasi më 12 shtator aty do të mbahet një koncert i Post Malone, duke e pamundësuar përdorimin e tij.

Përveç kërkesave të komunës, UEFA ka standardet e saj të pavarura për stadiumet që presin ndeshjet e Champions League, të cilat Barcelona duhet t’i plotësojë pavarësisht nga procesi administrativ lokal.

Pikërisht për këtë arsye, klubi katalanas ka kërkuar nga organizatorët e La Liga-s që ndeshjen e parë të kampionatit ta luajë në transfertë më 16, 17 ose 18 shtator, për t’i dhënë vetes edhe dy javë kohë shtesë. Objektivi është që më 30 shtator ose 1 tetor, ‘Camp Nou’ të jetë gati për të pritur ndeshjen e parë europiane të sezonit.