Fox News: Takimi mes Trump dhe Putinit do realizohet javën që vjen, ja ku do mbahet

FOX NEWS

Një samit mes presidentit rus Vladimir Putin dhe presidentit amerikan Trump mund të ndodhë që javën e ardhshme. 

Dy burime të njohura me negociatat i thanë Fox News se samiti është në përgatitje që nga e hëna e ardhshme, dhe Roma është përmendur si një nga vendet e mundshme të zhvillimit.

Nëse takimi zhvillohet më vonë gjatë javës, Roma mund të mbetet ende një mundësi, megjithatë edhe vende të tjera në Europë dhe jashtë saj janë në diskutim.

Samiti mund të dështojë gjithsesi, pasi presidenti ukrainas Volodymyr Zelensky i ka bërë të ditur SHBA-së se nuk do të pranojë të dorëzojë asnjë territor në një marrëveshje paqeje me Rusinë, dhe se vetëm parlamenti ukrainas mund të marrë një vendim të tillë.

Një takim mes Putinit dhe Trump do të ishte i pari që nga kthimi i Trump në detyrë këtë vit. Ky do të përbënte një moment të rëndësishëm në luftën 3-vjeçare, edhe pse nuk ka asnjë garanci se një takim i tillë do të sjellë fundin e luftimeve, pasi Rusia dhe Ukraina mbeten ende shumë larg në kërkesat e tyre.

Trump, duke dalë më vonë përpara gazetarëve në Shtëpinë e Bardhë, nuk iu përgjigj pyetjeve për vendndodhjen e mundshme të një takimi, por kur u pyet për një samit me Putinin dhe Zelenskyyn, tha: “Ka një mundësi shumë të mirë që ata do të takohen.”

Presidenti nuk pranoi të parashikonte se sa afër ishte arritjes së një marrëveshjeje për t’i dhënë fund luftës, duke thënë: “Jam zhgënjyer më parë me këtë çështje.”