Netanyahu: Do ta pushtojmë të gjithë Gazën, më pas do ia kalojmë forcave arabe

Pak para nisjes së mbledhjes së kabinetit të sigurisë, kryeministri izraelit Benjamin Netanyahu ka shtuar disa detaje mbi planin për pushtimin e Gazës, i cili, pavarësisht kundërshtimeve të mundshme nga disa ministra, pritet të marrë shumicën e votave. Në dy intervista të ndara, Netanyahu deklaroi fillimisht se “Izraeli do të pushtojë të gjithë Rripin e Gazës”, por më pas sqaroi se nuk ka për qëllim aneksimin e saj, por dorëzimin ndaj një “organizmi të përkohshëm”.

"Izraeli nuk synon të qeverisë Gazën, por ta çlirojë nga Hamasi:Duam të krijojmë një perimetër sigurie dhe t’ia dorëzojmë Gazën forcave arabe që do ta qeverisin siç duhet” U shpreh kryeministri izraelit Benjamin Netanyahu në një intervistë për Fox.

Sipas raportimeve, plani parashikon fillimisht marrjen nën kontroll të qytetit të Gazës dhe zgjerimin e qendrave të shpërndarjes së ndihmave humanitare, në bashkëpunim me Shtetet e Bashkuara.

Megjithatë, brenda vetë Izraelit nuk ka unitet: shefi i shtabit të ushtrisë izraelite (IDF), Eyal Zamir, së bashku me disa gjeneralë të tjerë, vazhdojnë të paralajmërojnë për rreziqet që sjell një operacion i tillë. Edhe opozita dhe familjarët e pengjeve janë kundër. “I thashë Netanyahut se pushtimi i Rripit është një ide e keqe. Shumica e popullsisë nuk e mbështet,” u shpreh ish-kryeministri izraelit Yair Lapid pas një takimi me Netanyahun, i cili duket i vendosur ta çojë përpara planin e tij.