Ish-aktori i Superman, Dean Cain, thotë se do t'i bashkohet agjencisë ICE të Trump për të 'ndihmuar në shpëtimin e Amerikës'

Dean Cain, i njohur për rolin e Supermanit në serialin e viteve ’90 Lois & Clark: The New Adventures of Superman, ka njoftuar se do t’i bashkohet Zyrës së Imigracionit dhe Doganave të SHBA-së (ICE), agjencisë kontroverse që ndodhet në qendër të fushatës së ashpër të Presidentit Donald Trump kundër emigracionit.

“Do të betohem sa më shpejt të jetë e mundur,” tha Cain për Fox News, duke e quajtur vendimin e tij “detyrë patriotike”. “Ky vend është ndërtuar mbi patriotë që dalin përpara, edhe kur nuk është popullore. Unë besoj se kjo është gjëja e duhur.”

Cain, një mbështetës i zjarrtë i Trump dhe lëvizjes së tij MAGA, ka publikuar gjithashtu një video në rrjetet sociale, duke u bërë thirrje ndjekësve të mbështesin ICE: “Po arrestojnë më të këqijtë e të këqijve. Më pëlqen kjo. Votova për këtë. Ata kanë nevojë për ndihmën tuaj.”

Vendimi i tij vjen ndërsa administrata Trump ka shtuar ndjeshëm fondet për ICE – me 75 miliardë dollarë shtesë – dhe ka vendosur një objektiv agresiv prej 3,000 arrestimesh në ditë. Operacionet përfshijnë gjithnjë e më shumë jo vetëm emigrantë pa dokumente, por edhe persona me status ligjor apo qytetarë amerikanë.

Reagimet kanë qenë të forta dhe të menjëhershme. Aktivistët tërheqin vëmendjen për ironinë e situatës: Cain është më i njohur për rolin e një alieni pa dokumente nga planeti Kripton, që mbërriti në Tokë dhe u bë simbol i shpresës dhe drejtësisë.

“Vetë Supermani do të zhgënjehej nga ty, Dean,” shkroi një përdorues në X. Cain u përgjigj shkurt: “S’ka shans.”

Protestat kundër bastisjeve po përhapen në qytete të ndryshme të SHBA-së. Kritikët e akuzojnë ICE për shkelje të të drejtave të njeriut, ndërsa administrata Trump ka marrë një qëndrim gjithnjë e më represiv edhe ndaj demonstruesve dhe qytetarëve që i kundërshtojnë publikisht arrestimet.

Cain nuk është i panjohur për polemika. Më herët këtë vit, ai kritikoi ribërjen e fundit të Superman nga James Gunn – një sukses kritik dhe komercial – duke e akuzuar Hollywoodin se është bërë “shumë i zgjuar” dhe se po i deformon personazhet klasike për motive ideologjike.

Por për shumë njerëz, lajmi i fundit i Cain përfaqëson një përplasje të thellë mes simbolikës së një heroi që mbronte të pambrojturit, dhe një realiteti politik gjithnjë e më të ashpër ndaj emigrantëve. Ironia është kaq e thellë, saqë rrjeti nuk ka pushuar së reaguar.

Në sfondin e një Amerike të polarizuar, Dean Cain nuk është më vetëm aktor – ai është bërë një figurë që mishëron tensionet mes kujtesës kulturore dhe realitetit politik. Dhe ndërsa përgatitet të mbajë armën e një agjenti ICE, shumë po e pyesin: çfarë ndodhi me Njeriun e Çelikut që dikur luftonte për të dobëtit?