Trump shpall tarifën 100% mbi çipat e kompjuterëve nëse firmat nuk ndërtojnë në SHBA

Presidenti Donald Trump ka njoftuar se do të vendosë një tarifë 100% për çipat kompjuterikë, përveç rasteve kur kompanitë zotohen se do të prodhojnë në tokën amerikane. Ky vendim i fundit vjen më shumë se tre muaj pasi administrata e tij përjashtoi përkohësisht shumicën e elektronikës nga tarifat më të ashpra.

Vendimi i Trump pritet të rrisë çmimet për produktet që varen nga këto çipa, duke ushtruar presion të madh mbi kompanitë amerikane të teknologjisë që aktualisht mbështeten gjerësisht te Azia për furnizim.

Në një deklaratë të përbashkët me shefin ekzekutiv të Apple, Tim Cook, Trump tha se vendimi i tarifës synon të forcojë prodhimin vendas. Cook nga ana e tij premtoi një investim shtesë prej 100 miliardë dollarësh në prodhimin brenda SHBA-së, duke e çuar angazhimin total të Apple në 600 miliardë dollarë.

Në vazhdën e këtij zhvillimi, edhe gjigantë të tjerë të teknologjisë si Nvidia dhe TSMC kanë njoftuar plane të ngjashme për të investuar më shumë në SHBA. Që prej rikthimit të Trump në Shtëpinë e Bardhë në janar, kompanitë e mëdha të teknologjisë kanë premtuar investime të përgjithshme mbi 1.5 trilionë dollarë në vend.

Megjithatë, mbetet për t’u parë nëse marrëveshja mes Trump dhe Cook do të mjaftojë për të mbrojtur prodhimin e iPhone-ve në Kinë dhe Indi nga tarifat tashmë ekzistuese dhe për të shmangur rritjen e çmimeve për modelet e reja që priten të prezantohen muajin tjetër.

Tregjet reaguan pozitivisht ndaj lajmit: aksionet e Apple u rritën me mbi 5% gjatë tregtimit të rregullt të së mërkurës dhe më shumë se 2% në tregtimin pas orarit. Edhe Nvidia, prodhuesi i çipave për inteligjencën artificiale, shënoi rritje të lehtë, duke shtuar vlerën e saj të tregut që ka fituar mbi 1 trilion dollarë që nga fillimi i mandatit të dytë të Trump.

Kërkesa globale për çipa kompjuterikë ka njohur rritje të shpejtë, me shitjet që janë rritur me 19.6% në vitin që përfundoi në qershor, sipas të dhënave të organizatës World Semiconductor Trade Statistics.

Strategjia e Trump përmes tarifave paraqet një shkëputje të qartë nga qasja e administratës së mëparshme Biden, e cila përmes ligjit CHIPS and Science Act të vitit 2022 kishte ofruar mbi 5 miliardë dollarë në mbështetje për ndërtimin e fabrikave, kërkimin shkencor dhe trajnimin e punëtorëve. Ndryshe nga kjo qasje me subvencione dhe stimuj financiarë, Trump po përdor presionin tarifor si mënyrë për të detyruar kompanitë të kthehen në prodhim brenda SHBA-së – një strategji që pritet të përballet me sfida të forta ekonomike dhe politike.