Liban/ Ushtria njofton se ka vrarë tre trafikantë droge

Ushtria e Libanit ka njoftuar të mërkurën se ka vrarë tre nga trafikantët më të njohur dhe të rrezikshëm të drogës në vend, gjatë një ndjekjeje të armatosur në verilindje të territorit.

Sipas deklaratës zyrtare, incidenti ndodhi në zonën Al-Sarawneh të rajonit Baalbek, kur forcat ushtarake po ndiqnin një automjet që transportonte personat e kërkuar.

Gjatë ndjekjes, shpërtheu një përplasje me armë zjarri mes tyre dhe ushtarëve, çka çoi në vrasjen e tre të dyshuarve.

“Të vrarët ishin ndër trafikantët më famëkeq dhe më të rrezikshëm në vend. Ata ishin në kërkim për përfshirje në vrasje ushtarësh, rrëmbime personash, sulme ndaj postblloqeve dhe patrullave të ushtrisë, si dhe për grabitje të armatosura,” thuhet në deklaratën e ushtrisë.

Baalbek, një rajon në lindje të Libanit nën ndikimin e lëvizjes Hezbollah, është shpesh vatër përleshjesh të armatosura mes familjeve të fuqishme rivale dhe zonë e njohur për veprimtari kriminale.

Ushtria ndërmerr shpesh operacione në këtë zonë, veçanërisht në Al-Sarawneh, për të luftuar trafikun e drogës, rrëmbimet dhe krimet e tjera.

Autoritetet sqaruan se kishin tentuar disa herë të arrestonin personat e vrarë në operacione të mëparshme, gjatë të cilave ishin plagosur edhe ushtarë.