Italia ndalon përdorimin e barnave për ‘ndryshimin e seksit’ te fëmijët, miraton ligjin

Nga Alba Kepi

Qeveria italiane vendos një kufizim për përdorimin e barnave për “ndryshimin e seksit” te fëmijët.

Me propozimin e ministrit të Shëndetësisë, Orazio Schillaci, dhe të ministres për familjen, lindshmërinë dhe mundësitë e barabarta, Eugenia Roçella, Qeveria Meloni miratoi një projektligj që parashikon dispozita për të vlerësuar kur dhe në çfarë kushtesh mund të përshkruhen dhe administrohen barna që përdoren për të ashtuquajturën disfori gjinore te të miturit.

"Duke u bazuar në udhëzimet aktuale të Agjencisë Italiane të Barnave (AIFA) dhe në mendimin e Komitetit Kombëtar për Bioetikën (CNB), – shpjegohet në një shënim të qeverisë pas mbledhjes së Këshillit të Ministrave – “në konsideratë të debatit të zhvilluar në nivel ndërkombëtar dhe të mungesës së të dhënave të plota në lidhje me trajtimet për disforinë gjinore te të miturit në Itali, projektligji fut dispozita për një monitorim efektiv të të dhënave dhe për mbrojtjen e shëndetit të të miturve”.

Në pritje të përcaktimit dhe miratimit të protokolleve të sakta, administrimi i barnave që bllokojnë pubertetin – që  kanë si qëllim trajtimin e disforisë gjinore te fëmijët dhe adoleshentët – do të jetë e mundur vetëm pas miratimit nga një komision kombëtar etik për pediatrinë.

Substanca më e përdorur është triptorelina, një analog sintetik i hormonit clirues të gonadotropinës (GnRH), i cili vepron duke bllokuar  prodhimin e hormoneve seksuale, si mashkullore ashtu edhe femërore.

Projektligji i qeverisë Meloni “Dispozita për përshtatshmërinë e përshkrimit dhe përdorimit të saktë të  barnave për disforinë gjinore”, i paraqitur nga Schillaci dhe Roçella, u miratua dje nga Këshilli i Ministrave. Qëllimi është të futen masa që garantojnë më shumë mbrojtje për shëndetin e fëmijëve.

Çfarë parashikon projektligji?

Administrimi i barnave që bllokojnë pubertetin dhe i hormoneve që synojnë të drejtojnë zhvillimin në drejtimin e dëshiruar, do të duhet tani të kushtëzohet me një  diagnozë nga një ekip multidisiplinar, ndjekjen e rrugëve të sakta psikologjike, psikoterapeutike dhe nëse është e nevojshme edhe psikiatrike, respektimin e protokolleve klinike që do të miratohen nga Ministria e Shëndetësisë, si dhe me marrjen e një pëlqimi të informua dhënë në mënyrën e përcaktuar për trajtimet shëndetësore të të miturve.

"Të dhënat e mbajtura në regjistër do t’i transmetohen Ministrisë së Shëndetësisë çdo gjashtë muaj. Raporti duhet të përmbajë elementet dhe informacionin mbi procesin vendimmarrës të përshkrimit të barnave, përfshirë rezultatet e dokumentuara të trajtimeve të mëparshme psikologjike, psikoterapeutike e psiqike, monitorimin klinik dhe ndjekjen pas trajtimit."

Projektligji parashikon gjithashtu ngritjen e një tavoline teknike për vlerësimin e raportit gjashtëmujor të AIFA-s dhe dërgimin në Parlament të një raporti çdo tre vjet.