Çështja Epstein/ Komisioni i Mbikëqyrjes thërret Departamentin e Drejtësisë dhe zyrtarë të profilit të lartë për të dëshmuar

Të martën, Komisioni i Mbikëqyrjes së Dhomës së Përfaqësuesve lëshoi thirrje për dëshmi ndaj një sërë ish-prokurorësh të përgjithshëm dhe ish-drejtorësh të FBI-së, si dhe ndaj ish-Presidentit Bill Clinton, në lidhje me çështjen që përfshin kriminelin seksual të dënuar Jeffrey Epstein.

Thirrjet për dëshmi ndaj ish-zyrtarëve të Departamentit të Drejtësisë u lëshuan pasi republikanët dhe demokratët në një nënkomision të Komisionit të Mbikëqyrjes miratuan muajin e kaluar masat për t’i autorizuar ato, si pjesë e përpjekjeve të Kongresit për të marrë më shumë informacion mbi Epstein-in.

Hetuesit e Dhomës gjithashtu kanë thirrur prokuroren e përgjithshme Pam Bondi, në lidhje me hetimin e Departamentit të Drejtësisë mbi Epstein-in dhe bashkëpunëtoren e tij Ghislaine Maxwell, e cila po vuan një dënim me 20 vite burg. Departamenti konfirmoi se kishte marrë thirrjen, por nuk bëri komente të tjera.

Komisioni kërkon dëshmi nga Clinton-i dhe nga ish-Sekretarja e Shtetit Hillary Clinton, si edhe nga zyrtarë që shtrihen në katër administratat e fundit presidenciale: ish-prokurorët e përgjithshëm Merrick Garland, Bill Barr, Alberto Gonzales, Jeff Sessions, Loretta Lynch dhe Eric Holder, si dhe ish-drejtorët e FBI-së James Comey dhe Robert Mueller. Sessions dhe Barr udhëhoqën Departamentin e Drejtësisë gjatë mandatit të parë të presidentit Trump. Ligjvënësit po kërkojnë informacion nga çiftit Clinton për shkak të lidhjeve të mëparshme të ish-presidentit me Epstein-in dhe Maxwell-in në fillim të viteve 2000.

Letërthirrjet nga përfaqësuesi James Comer nga Kentucky, një republikan që kryeson Komisionin e Mbikëqyrjes, janë të ngjashme mes tyre. Dokumentet nga Departamenti i Drejtësisë duhet të dorëzohen deri më 19 gusht, sipas komisionit, dhe seancat dëgjimore janë planifikuar përgjatë muajve gusht, shtator dhe tetor.

“Ndërkohë që Departamenti ndërmerr përpjekje për të zbuluar dhe bërë publike informacione shtesë lidhur me çështjet e z. Epstein dhe znj. Maxwell, është thelbësore që Kongresi të ushtrojë mbikëqyrje mbi zbatimin nga qeveria federale të ligjeve për trafikimin seksual në përgjithësi, dhe veçanërisht për mënyrën se si janë trajtuar hetimi dhe ndjekja penale ndaj z. Epstein dhe znj. Maxwell,” shkruan Comer, duke shtuar se komisioni i mbikëqyrjes “mund të përdorë rezultatet e këtij hetimi për të hartuar zgjidhje ligjore që përmirësojnë përpjekjet federale kundër trafikimit seksual dhe reformojnë përdorimin e marrëveshjeve për mos-ndjekje penale dhe/ose marrëveshjeve për pranimin e fajësisë në hetimet për krime seksuale.”

Një zëdhënës i Clinton-it tha në vitin 2019, pas ngritjes së aktakuzës federale ndaj Epstein-it, se ish-presidenti kishte udhëtuar katër herë me avionin e Epstein-it në vitet 2002 dhe 2003, duke vizituar Evropën, Azinë dhe Afrikën. Angel Ureña, zëdhënësi, tha se udhëtimet ishin të lidhura me Fondacionin Clinton, dhe se në çdo udhëtim ndodheshin edhe stafi, përkrahësit e fondacionit dhe truproja e Shërbimit Sekret të Clinton-it. Clinton gjithashtu kishte pasur një takim me Epstein-in në vitin 2002 dhe kishte bërë “një vizitë të shkurtër” në apartamentin e Epstein-it bashkë me një punonjës dhe sekretarin e tij, sipas Ureña-s.

“Presidenti Clinton nuk ka asnjë dijeni për krimet e tmerrshme për të cilat Jeffrey Epstein e pranoi fajësinë në Florida disa vite më parë apo për ato me të cilat u akuzua së fundmi në Nju Jork,” tha ai, duke shtuar se Clinton nuk kishte folur me Epstein-in për më shumë se një dekadë dhe nuk kishte qenë kurrë në ishullin e tij, në fermën në New Mexico apo në banesën në Florida.

Presidentët e mëparshëm nuk janë detyruar të dëshmojnë përpara Kongresit, por disa prej tyre kanë pranuar vullnetarisht të përgjigjen ndaj pyetjeve nga komisionet, përfshirë presidentët Gerald Ford në 1983, Harry Truman në 1955 dhe William Howard Taft në disa raste, sipas të dhënave të Senatit.

Epstein u akuzua për trafikim seksual në nivel federal në vitin 2019 dhe vdiq nga vetëvrasja në burg ndërsa priste gjyqin. Ai ishte hetuar më parë nga autoritetet federale në Florida në fillim të viteve 2000, por hetimi përfundoi me një marrëveshje për mos-ndjekje penale dhe një pranim fajësie për akuza shtetërore mbi prostitucionin në vitin 2008.

Por Kongresi ka rritur sërish vëmendjen ndaj Epstein-it pasi Departamenti i Drejtësisë dhe FBI publikuan muajin e kaluar një memo që përfundonte se Epstein nuk kishte një “listë klientësh” me figura të njohura dhe konfirmonte se ai kishte vdekur nga vetëvrasja. Memoja gjithashtu arrinte në përfundimin se nuk kishte “prova të besueshme” që ky financues i turpëruar kishte shantazhuar njerëz të fuqishëm. Departamenti i Drejtësisë dhe FBI thanë se nuk kishin në plan të publikonin më shumë informacion mbi çështjen e Epstein-it.

Këto përfundime kanë zemëruar disa nga përkrahësit e Trump-it, të cilët janë skeptikë për idenë se nuk ka më asgjë tjetër për t’u zbuluar lidhur me këtë rast. Mes reagimeve të forta, zëvendësprokurori i përgjithshëm Todd Blanche u takua me Maxwell-in në fund të muajit të kaluar për dy ditë në Tallahassee, ku ajo po vuante dënimin, përpara se të transferohej javën e kaluar në një burg me siguri minimale në Teksas.

Maxwell u dënua në vitin 2021 për rolin e saj në ndihmën ndaj Epstein-it për të rekrutuar, manipuluar dhe abuzuar seksualisht me vajza të mitura. Apeli i saj është në pritje të shqyrtimit nga Gjykata e Lartë. Komisioni i Mbikëqyrjes së Dhomës e thirri për dëshmi muajin e kaluar dhe caktoi seancën për më 11 gusht. Por Comer ofroi të shtyjë intervistën përderisa Gjykata e Lartë shqyrton nëse do ta marrë në shqyrtim rastin e saj. Gjyqtarët do të diskutojnë kërkesën në një seancë me dyer të mbyllura më 29 shtator, por nuk kanë afat për të vepruar.

Comer tha se komisioni do të “hyjë në negociata në mirëbesim” për dëshminë, por nuk do t’i japë Maxwell-it imunitet kongresional dhe as nuk do t’ia dërgojë pyetjet paraprakisht, dy kërkesa të bëra nga avokati i saj.

Blanche dhe Bondi gjithashtu kanë kërkuar nga gjyqtarët federalë në Nju Jork që të zbulojnë transkriptet e jurisë së madhe nga çështjet Epstein dhe Maxwell, edhe pse rregullat federale zakonisht kërkojnë që procedurat para jurive të mëdha të mbahen sekret.

Përveç veprimeve të Departamentit të Drejtësisë, ligjvënësit kanë shtyrë përpara për publikimin e dosjeve të lidhura me Epstein-in. Një përplasje mes anëtarëve të Dhomës për materialet çoi në anulimin e votimeve dhe largimin e parakohshëm të Kongresit nga Uashingtoni për pushimet njëmujore të verës.

Republikanët e Dhomës propozuan muajin e kaluar një rezolutë jodetyruese për të bërë publike dosjet nga hetimi federal mbi Epstein-in, por Kryetari i Dhomës Mike Johnson tha se Dhoma nuk do të votojë për të deri në shtator, kur ligjvënësit të rikthehen nga pushimet./ Syri.net/