Spanja përjeton një nga muajt e saj më të këqinj, 1,060 vdekje në korrik nga temperaturat e larta

Spanja po përballet me një verë të pamëshirshme, ku vala e fundit e të nxehtit ka marrë tashmë viktimën e parë në gusht — një burrë 85-vjeçar që humbi jetën të hënën në Badajoz si pasojë e goditjes nga nxehtësia.

Ky episod vjen menjëherë pas një korriku shkatërrues, gjatë të cilit 1,060 vdekje u regjistruan si të lidhura me temperaturat ekstreme, sipas të dhënave nga Sistemi i Monitorimit të Vdekshmërisë Ditore (MoMo).

Kjo përfaqëson një rritje alarmante prej 57% krahasuar me të njëjtën periudhë të vitit 2024 dhe 54.5% më shumë se korriku i vitit 2023. E ndërsa vera nuk ka mbaruar ende, bilanci total për vitin 2025 ka arritur tashmë në 3,255 vdekje, duke kaluar me shumë diferencë shifrën vjetore të 2024-ës, që ishte 2,534.

Gadishulli Iberik përvëlohet nën valët e të nxehtit

Aktualisht, pjesa më e madhe e Gadishullit Iberik po përjeton një tjetër valë të të nxehtit brutal, me nëntë rajone në gjendje gatishmërie për shkak të temperaturave ekstreme. Vlerat më të larta priten të arrijnë deri në 42°C në zona si Badajoz dhe Jaén, dhe 38°C në Madrid. Qytetet bregdetare si Barcelona, Malaga dhe Valencia do të përjetojnë disi më pak intensitet, me temperatura mes 30°C dhe 33°C.

Kur do të përfundojë vala?

Agjencia Shtetërore Meteorologjike e Spanjës (AEMET) ka paralajmëruar se kjo valë e të nxehtit pritet të zgjasë të paktën deri të dielën e ardhshme. Sipas AEMET, temperaturat do të vazhdojnë të jenë jashtëzakonisht të larta të martën dhe të mërkurën, me rritje të mundshme në disa zona.

Megjithatë, fundjava mbetet e paqartë. “Me informacionin aktual, skenari më i mundshëm është që të premten temperaturat të bien në zonën e Detit Kantabrian, por të rriten sërish në perëndim të gadishullit. Kjo do të thotë se vala e të nxehtit do të vazhdojë të paktën deri në fundjavë”, thuhet në deklaratën e AEMET.

Ndikimet në shëndet dhe paralajmërimet

Ekspertët e shëndetit publik theksojnë se nxehtësia ekstreme mund të përkeqësojë sëmundjet ekzistuese, të ndikojë në sistemin kardiovaskular dhe të shkaktojë goditje nga nxehtësia, sidomos tek të moshuarit dhe personat me sëmundje kronike. Autoritetet u bëjnë thirrje qytetarëve të shmangin qëndrimin në diell në orët e pikut, të konsumojnë shumë ujë dhe të kërkojnë ndihmë mjekësore për çdo shenjë shqetësuese.

Me shumë javë të verës ende përpara, autoritetet janë në gatishmëri për të përballuar pasojat e mëtejshme të një vere që po bëhet gjithnjë e më vdekjeprurëse.