Llojet e zakonshme të ilaçeve që nuk duhen marrë me kafe

Kafeja është pjesë e rutinës së përditshme për shumë njerëz, por mund të ndikojë negativisht në disa ilaçe, duke ulur efektin e tyre ose rritur rrezikun për efekte anësore.

1. Ilaçet kundër të ftohtit dhe gripit

Shumë ilaçe për të ftohtin, si ato që përmbajnë pseudoefedrinë, janë stimulues, ashtu si edhe kafeina. Kur merren së bashku, mund të shkaktojnë nervozizëm, pagjumësi, rrahje të shpejta të zemrës dhe dhimbje koke. Kjo vlen edhe për disa ilaçe për astmën dhe ADHD-në, si teofilina dhe amfetaminat.

2. Barnat për tiroiden dhe osteoporozën

Kafeja mund të ulë absorbimin e levotiroksinës (përdorur për tiroiden e ngadaltë) deri në 50%, sepse përshpejton lëvizjen e zorrëve dhe mund të lidhet me ilaçin në stomak. Kjo ndikon në përthithjen e tij dhe mund të rikthejë simptomat e hipotiroidizmit. E njëjta kujdes vlen për ilaçet e osteoporozës si alendronati dhe risedronati, të cilat duhen marrë me stomak bosh dhe me pritje prej 30–60 minutash para se të konsumoni kafe ose ushqim.

3. Antidepresantët dhe antipsikotikët

SSRI-të si sertralina dhe citaloprami mund të kenë përthithje më të ulët kur merren me kafe. Triciklikët (p.sh. amitriptilina) përpunohen nga një enzimë e mëlçisë që metabolizon edhe kafeinën. Konkurrenca mes tyre mund të ngadalësojë zbërthimin e ilaçit dhe të rrisë efektet anësore. Kafeja gjithashtu mund të rrisë nivelin e klozapinës, një antipsikotik, deri në 97%, duke shtuar rrezikun për përgjumje, konfuzion ose komplikime serioze.

4. Qetësuesit kundër dhimbjes

Disa qetësues si aspirina ose paracetamoli përmbajnë kafeinë, e cila mund të përshpejtojë përthithjen e tyre. Megjithatë, kjo gjithashtu mund të rrisë rrezikun për irritim të stomakut ose gjakderdhje, veçanërisht nëse konsumoni burime të tjera të kafeinës në të njëjtën kohë.

5. Barnat për zemrën

Kafeina mund të rrisë përkohësisht tensionin dhe rrahjet e zemrës, që mund të kundërshtojë efektin e barnave për presion të lartë të gjakut ose aritmi. Nuk është e nevojshme ta shmangni kafenë krejtësisht, por është mirë të monitoroni ndikimin e saj dhe të konsideroni uljen e sasisë ose kalimin në version pa kafeinë.

Çfarë mund të bëni?

Merrni levotiroksinën dhe ilaçet për osteoporozë me ujë, me stomak bosh, dhe prisni 30–60 minuta para kafesë.

Shmangni kombinimin e kafesë me ilaçet për ftohje, astmë, ADHD, apo ato me veprim stimulues.

Konsultohuni me mjekun nëse merrni antidepresantë, antipsikotikë ose ilaçe për tensionin.

Merrni parasysh kalimin në kafe pa kafeinë nëse ndieni nervozizëm, pagjumësi ose palpitacione.

Çdo organizëm e përpunon ndryshe kafeinën, kushtojini vëmendje reagimeve tuaja.

Nëse nuk jeni të sigurt për ndërveprimin mes kafesë dhe ilaçeve tuaja, këshillohuni me farmacistin ose mjekun. Një bisedë e shkurtër mund t’ju ndihmojë të shmangni javë të tëra me efekte të padëshiruara dhe të vazhdoni të shijoni kafenë me qetësi. / Independent - Syri.net