Terror në ushtrinë e Putinit: Ushtarët rusë lidhin dhe keqtrajtojnë shokët e tyre... Publikohen pamjet e rënda!/FOTO & VIDEO

Ushtarët rusë e quajnë këtë praktikë një “flijim për Baba Yaga-n”, shtrigën e frikshme të folklorit sllav, e cila ushqehet me viktimat e saj.

Një ushtar rus shihet në një video i lidhur pas një peme dhe i braktisur në mëshirë të fatit — ndoshta për vdekje — nga një prej dronëve të mëdhenj luftarakë të Ukrainës.

Pse ndodhin këto ngjarje është e qartë nga një përgjim radiofonik për një incident të ngjashëm, i ndarë me CNN, ku dëgjohet qartë një komandant rus që urdhëron vartësin e tij ta lidhë një ushtar në këtë mënyrë si ndëshkim për dezertim.

Urdhri jepet dy herë: “Fshihe diku (derisa të mbarojë luftimet), pastaj nxirre jashtë dhe lidhe te një pemë... brenda gjysmë ore.”

Një komandant i batalionit të dronëve ukrainas thotë se e ka parë këtë ndodhur dy herë vetë dhe e ka dëgjuar shpesh në përgjimet radiofonike.

“Çdo dron i madh ukrainas, ata e quajnë Baba Yaga. Kjo krijon panik të tmerrshëm tek këta njerëz të traumatizuar. Për ta, është si një mit i frikshëm që fluturon dhe vret kë të mundë,” tha për CNN komandanti, me nofkën Munin.

Kjo praktikë është vetëm një nga një mori keqtrajtimesh të tmerrshme që ndodhin në fushën e betejës, të dokumentuara në video nga dronët vëzhgues ukrainas apo edhe nga vetë ushtarët rusë, e më pas të shpërndara në rrjetet sociale.

Ndërsa forcat e Moskës bëjnë përparim të ngadaltë por të pandalshëm në Ukrainë, videot japin një pasqyrë të errët të realitetit brenda ushtrisë së Putinit — një forcë nga e cila dhjetëra mijëra burra rusë besohet se kanë dezertuar që nga fillimi i pushtimit të plotë në fillim të vitit 2022.

Në një video, e xhiruar duket se gjatë dimrit të kaluar, një burrë shihet nga afër, i lidhur pas një peme.

Ai thotë se është nga Kamensk-Uralsky, një qytet në qendër të Rusisë, në anën lindore të maleve Urale.

Ai shpjegon se kishte dezertuar pasi ishte trembur nga një dron ukrainas që fluturonte sipër. Një bashkëluftëtar që e kishte ndjekur i kishte bërë një propozim, tregon ai:

“Lëri të të bëj ‘300’, që të të tërheqin nga fronti,” i kishte thënë ushtari, duke përdorur një term që në ushtrinë ruse nënkupton një luftëtar të plagosur.

Më pas erdhi kushti:

“Ti më qëllo mua, dhe unë do të të qëlloj ty.”

Ai thotë në kamera se kishte refuzuar, por bashkëluftëtari e kishte qëlluar gjithsesi, duke e bërë një kapje të lehtë për pjesëtarët e njësisë së tij. Tani, i lidhur me një kabëll të trashë te pema, ai sheh me ankth nga qielli, ndërsa një zë pas kamerës i thotë se një dron po afrohet.

“(Nëse droni) vjen këtu, ajo do të hedhë gjithçka mbi ty,” e tall zëri.

Në këtë pikë, videoja ndërpritet dhe fati i ushtarit mbetet i paqartë.

Thirrje të dëshpëruara drejtuar Putinit

Ashtu si shumë ushtri të tjera, Rusia nuk flet publikisht për rastet e dezertimit. Por rrjetet sociale – kryesisht Telegram – ofrojnë një dritare mbi ankthin e thellë dhe dëshpërimin e shumë ushtarëve dhe familjeve të tyre, duke treguar pse disa zgjedhin të dorëzohen ose të ikin.

“Shumë i nderuar Vladimir Vladimirovich,” fillon një video në Telegram nga një burrë i identifikuar si Yuri Duryagin, në një apel personal ndaj presidentit rus.

Duryagin thotë se kishte luftuar në rajonin Donetsk të Ukrainës, ku mungesa e pajisjeve dhe e municioneve bëri që vetëm 32 burra nga kompania e tij të mbijetonin në një betejë të vetme. Zakonisht, një kompani ka deri në 150 efektivë.

Ai i thotë Putinit se ka marrë më pak se një të pestën e pagës së tij dhe se eprorët i kishin thënë se ankesat ishin të kota.

Kur ndodhnin vdekje në fushën e betejës, shpesh fshiheshin për të shmangur pagesën e kompensimeve për familjet e viktimave.

“Unë vetë i kam parë shokët të vdesin para syve të mi. U vranë. Prindërit përpiqeshin të merrnin informacion, por u thoshin se personi është zhdukur,” thotë ai.

Ndoshta akuza më tronditëse që ai ngre është se një komandant i kishte pushkatuar ushtarët që refuzonin të përballeshin me zjarrin armik: “I vuri për muri sepse thjesht refuzuan të dalin përballë mitralozit.”

“Të gjithë do të jenë të vdekur brenda javës”

“Dhuna është ajo që po e mban gjallë ushtrinë ruse dhe po e mban të bashkuar,” tha Grigory Sverdlin, themelues i organizatës Get Lost, që ndihmon rusët të shmangin rekrutimin ose të dezertojnë.

Duke folur nga Barcelona, ku tashmë është vendosur organizata, Sverdlin tha për CNN se kanë ndihmuar 1,700 persona të dezertojnë që nga krijimi i saj gjashtë muaj pas fillimit të pushtimit të plotë.

Numri i saktë i dezertimeve është i vështirë të përcaktohet, por ai e vlerëson se janë dhjetëra mijëra.

Shumë dezertojnë para se të dërgohen në front, duke u ankuar për stërvitje të dobët prej vetëm një deri në tre javë, ndërsa ata që dezertojnë gjatë luftës përshkruajnë një kulturë të zhveshur nga çdo vlerë.

“Jeta e tyre nuk vlen asgjë për komandantët. Për një oficer rus, humbja e një tanku apo mjeti është shumë më keq se humbja e 10 apo 20 ushtarëve,” tha Sverdlin.

“Shpesh dëgjojmë nga klientët tanë se oficerët u thonë: ‘Të gjithë do të jeni të vdekur brenda javës. Unë do të marr një njësi tjetër, nuk është problem.’”

Për ushtarët rusë të dënuar për dezertim, dënimi mund të arrijë deri në 15 vjet burg. Por videot e shpërndara në rrjetet sociale tregojnë se ndëshkimet e menjëhershme dhe brutale janë të zakonshme, me synimin për të trembur të tjerët.

Në një video, një burrë pas kamerës i afrohet një kontenieri metalik me një shkallë anash.

“Koha për të ushqyer kafshët! Ata që u përpoqën të ikin! Të shohim çfarë po bëjnë,” thotë zëri, duke hapur kapakun dhe duke zbuluar tre burra gjysmë të zhveshur, të ulur brenda.

“Jeni të uritur?” tall kolegu. “Doni një biskotë?”

Njëri nga burrat tund kokën dhe një biskotë i thyhet në duart e shtrira, të cilën e ha menjëherë.

Një tjetër video tregon një burrë të përkulur përtokë, teksa goditet në fytyrë me shqelma. Një rrip portokalli i është lidhur në kyçin e këmbës, ndërsa tjetri skaj i tij është lidhur pas një makine tip xhip./CNN-Syri.Net