Lautaro dhe Calhanoglu bëjnë paqe, përqafim në rrjetet sociale

Në shtëpinë zikaltër është kthyer përfundimisht qetësia. Lautaro Martinez dhe Hakan Calhanoglu i kanë lënë pas tensionet që kishin pasuar Kupën e Botës për Klube dhe kanë bërë paqe. Pas disa javësh me polemika të nënkuptuara dhe pasiguri për të ardhmen e mesfushorit turk, rikthimi i të dyve në Milano ka shërbyer si momenti ideal për të sqaruar gjithçka.

Ka qenë vetë kapiteni i Interit që ka bërë hapin drejt pajtimit. Pasi është kthyer nga pushimet, Lautaro është takuar me Calhanoglu dhe ka vendosur të ndajnë publikisht një moment paqeje: një foto e postuar në Instagram Stories ku të dy shfaqen të buzëqeshur dhe të relaksuar. Një shenjë e qartë se mosmarrëveshjet i përkasin së shkuarës.

“Me Lautaron gjithçka është në rregull. Kur të kthehet, do ta përqafoj”, kishte thënë Calhanoglu në ditën e parë të stërvitjes në Appiano Gentile. Dhe kështu ndodhi. Pasi u kthye në qytet, Lautaro kërkoi menjëherë një ballafaqim me shokun e skuadrës për të lënë pas fjalët e ashpra që ishin shkëmbyer në SHBA dhe thumbimet në rrjetet sociale.

Në sfond mbetet edhe dilema e së ardhmes së Calhanoglu, e cila deri para pak ditësh ishte ende e paqartë. Por ky takim, përveç se zgjidhi një keqkuptim, ka shërbyer edhe për të rikthyer harmoninë dhe motivimin në prag të sezonit të ri, ku Interi do të nisë një epokë të re nën drejtimin e trajnerit të ri, Cristian Chivu.

Për tifozët zikaltër, kjo fotografi është më shumë se një postim, është një shenjë shprese që skuadra është e bashkuar dhe gati për sfidat e sezonit 2025-26. Tani fjalën e ka fusha.