'Ndjehesha sikur më kishin përdhunuar'/ Pesë gra australiane padisin Qatar Airways për kontrollet invazive në Doha

Pesë gra australiane kanë fituar të drejtën për të ndjekur penalisht Qatar Airways në Gjykatën Federale të Australisë, pas një apeli të suksesshëm lidhur me incidentin traumatizues të ndodhur në Aeroportin Ndërkombëtar Hamad në vitin 2020. Gratë u nxorën me forcë nga një fluturim dhe iu nënshtruan ekzaminimeve invazive pa pëlqimin e tyre, pasi një foshnjë u gjet e braktisur në një kosh plehrash në aeroport – ngjarje që shkaktoi reagime të ashpra ndërkombëtare.

Fillimisht, një gjyqtar australian kishte rrëzuar çështjen, duke deklaruar se Qatar Airways nuk mund të mbahej përgjegjëse sipas Konventës së Montrealit, një traktat që rregullon përgjegjësinë e linjave ajrore në rast aksidentesh. Megjithatë, trupi gjykues i Gjykatës Federale arriti në përfundimin se ai kishte gabuar, duke vendosur se gratë kishin të drejtë të padisin si linjën ajrore, ashtu edhe kompaninë që operon aeroportin, Matar.

Pesë gratë kishin ngritur padi në vitin 2021, duke kërkuar dëmshpërblim për “kontakt të paligjshëm fizik” dhe “burgosje të rreme”, si dhe për pasojat në shëndetin e tyre mendor, përfshirë depresionin dhe çrregullimin post-traumatik. Avokati i tyre, Damian Sturzaker, deklaroi se klientet e tij meritojnë të dëgjohen në gjykatë dhe të marrin kompensim për vuajtjet që kanë përjetuar.

Pavarësisht se shteti i Katarit dënoi me burgim të pezulluar një zyrtar aeroporti, gratë vazhduan betejën ligjore për shkak të mungesës së një kërkimfaljeje zyrtare dhe përpjekjes për të ndryshuar procedurat e aeroportit. Ato theksojnë se nuk ishin paralajmëruar dhe nuk kishin dhënë pëlqim për kontrollin, përjetim që njëra prej tyre e përshkroi si “ndjesinë e të qenit e përdhunuar”.

Me vendimin më të fundit, çështja do të vazhdojë në Gjykatën Federale australiane, duke hapur rrugën për një proces që mund të vendosë një precedent të rëndësishëm për të drejtat e pasagjerëve dhe përgjegjësinë e linjave ajrore ndërkombëtare.