Belgjika shtrëngon rregullat për bashkimin familjar të emigrantëve, çfarë thotë ligji i ri

Belgjika ka miratuar një projektligj të ri që kufizon ndjeshëm aksesin në ribashkimin familjar për migrantët, duke ndjekur një trend gjithnjë e më të përhapur në Evropë për ashpërsimin e politikave migratore.

Sipas ligjit të ri, refugjatët kanë vetëm gjashtë muaj për të paraqitur aplikimin për ribashkim, ndërsa personat me “mbrojtje plotësuese” do të duhet të presin dy vite për të bërë të njëjtën gjë.

Rregullat e reja gjithashtu kërkojnë të ardhura më të larta mujore nga aplikantët. Tani, një migrant që dëshiron të sjellë familjen duhet të fitojë të paktën 2,300 euro në muaj, një shumë që rritet me 10% për çdo anëtar shtesë të familjes. Nëse një person kërkon të ribashkohet me partnerin dhe dy fëmijët, ai duhet të ketë të ardhura neto mujore prej 2,700 eurosh.

Sipas Thomas Willekens nga organizata belge Vluchtelingenwerk Vlaanderen, kjo është një kërkesë “jashtëzakonisht e lartë” që shumë punonjës në Belgjikë nuk mund ta përmbushin. Ai paralajmëron se rregullat e reja do ta bëjnë virtualisht të pamundur ribashkimin familjar dhe do të kenë pasoja të rënda për integrimin e refugjatëve në shoqëri.

Masat janë mbrojtur nga ministrja belge për Azilin dhe Migracionin, Anneleen Van Bossuyt, e cila ka deklaruar se “shoqëria nuk mund të mbajë më këtë barrë” dhe se është e nevojshme të reduktohet fluksi i njerëzve që vijnë në vend përmes skemës së ribashkimit familjar. Vitin e kaluar, 20,724 persona jashtë BE-së përfituan nga kjo skemë në Belgjikë.

Përveç kufizimeve, autoritetet belge kanë vendosur gjithashtu të rrisin tarifën e aplikimit për natyralizim nga 150 euro në 1,000 euro – një ndryshim që ka ngjallur kritika të forta nga organizatat e të drejtave të njeriut.

Belgjika nuk është e vetmja që po ndërmerr këto masa. Portugalia dhe Gjermania kanë miratuar qasje të ngjashme, ndërsa Austria ka pezulluar përkohësisht përpunimin e kërkesave për ribashkim familjar. Sipas ekspertëve, ky trend evropian po e bën gjithnjë e më të vështirë për refugjatët të ndjekin rrugë të ligjshme për t’u bashkuar me familjet e tyre, duke rritur rrezikun që ata t’i drejtohen rrjeteve të kontrabandës.