Katastrofë ekologjike në Australinë Jugore: Algat toksike shkatërrojnë jetën detare dhe paralizojnë industrinë e peshkimit

Ujërat e pastra të Australisë Jugore janë kthyer në të gjelbra toksike, ndërsa një lulëzim masiv algash po përhapet me ritme alarmante, duke u shpallur “katastrofë natyrore” nga autoritetet vendore. Fenomeni, që ka nisur që në mars, ka zënë tashmë një sipërfaqe dy herë më të madhe se territori i Kryeqytetit Australian dhe ka vrarë mbi 400 lloje të jetës detare.

Kryeministri i Australisë Jugore, Peter Malinauskas, ka kërkuar reagim të menjëhershëm dhe njohjen e ngjarjes si fatkeqësi natyrore në nivel federal. “Kjo është një fatkeqësi natyrore dhe duhet të pranohet si e tillë”, tha ai, duke akuzuar qeverinë qendrore për hezitim të pajustifikuar. Qeveria e tij ka vënë në dispozicion 14 milionë dollarë australianë, të njëjtën shumë që u ofrua edhe nga niveli federal, për kërkime, pastrim dhe mbështetje të industrisë.

Por, pavarësisht dëmëve të konsiderueshme mjedisore dhe ekonomike, qeveria federale refuzon ta klasifikojë ngjarjen si katastrofë natyrore. Ministri i Mjedisit, Murray Watt, deklaroi se ngjarja nuk përmbush kriteret ligjore për një shpallje të tillë, ndonëse e cilësoi situatën “jashtëzakonisht shqetësuese”.

Ndërkohë, bregdeti nga Coorong deri në Gadishullin Yorke është shndërruar në një peizazh të frikshëm me peshq të ngordhur dhe erë të rëndë, ndërsa jetesa e peshkatarëve lokalë është paralizuar. “Kam marrë me vete peshkatarë që qajnë në telefon”, tha Ian Mitchell, ndërmjetës për industrinë e peshkimit.

Fenomeni i lulëzimit të algave është përkeqësuar nga ngrohja e ujërave, valët e nxehtësisë detare dhe ndotja me lëndë ushqyese — të gjitha pasojë e drejtpërdrejtë e ndryshimeve klimatike. Senatorja e të Gjelbërve, Sarah Hanson-Young, akuzoi qeverinë federale për standarde të dyfishta dhe shpërfillje: “Po të ndodhte në Bondi, kryeministri do të ishte në vendngjarje”.

Në mungesë të një përgjigjeje më të gjerë federale, autoritetet lokale dhe komunitetet po përballen të vetme me pasojat e një prej fatkeqësive ekologjike më të mëdha të dekadës në Australi.