15 fakte për Kleopatrën që zbulojnë gruan që fshihet pas mbretëreshës së Nilit

Poeti romak Propertius e quajti Kleopatrën "mbretëresha lavire". Kasio Dio e përshkroi atë si një "grua me seksualitet të pangopur dhe lakmi të pafund". Ata, dhe burra të tjerë romakë si ata, ishin në tërësi ata që regjistruan historinë e mbretëreshës egjiptiane. Por kush ishte në të vërtetë Kleopatra?

Në versionin romak të historisë, ajo ishte një grua joshëse që tërhoqi dy nga burrat më të fuqishëm të tyre, Jul Çezarin dhe Mark Antonin, përpara se të mposhtej nga Oktaviani (më vonë i njohur si Augusti). Por historia e saj është shumë më komplekse. E lindur në familje mbretërore, ajo duhej të luftonte për të arritur fronin e Egjiptit. Pasi e mori, ajo bëri gjithçka për të ruajtur pushtetin e saj.

Edhe pse sot njihet kryesisht për historitë e dashurisë dhe vetëvrasjen e saj nga nepërka në vitin 30 p.e.s., jeta e Kleopatrës përfshin shumë më tepër. Zbuloni më poshtë historinë e faraones së famshme egjiptiane, nga ngritja në pushtet, te fati i fëmijëve të saj, e deri te misteri i vendndodhjes së varrit të saj.

Kush ishte Kleopatra?

Kleopatra ishte faraonja e fundit e Egjiptit të lashtë dhe sundimtarja e fundit e dinastisë Ptolemeike (305–30 p.e.s.).

Për çfarë është e njohur Kleopatra?

Kleopatra është e njohur kryesisht për marrëdhëniet e saj me Jul Çezarin dhe Mark Antonin, si dhe për rolin e saj në ngritjen e perandorit të parë romak, Augustit. Jeta dhe vdekja e saj famëkeqe kanë frymëzuar veprën "Antoni dhe Kleopatra" të William Shakespeare-it, si edhe shumë drama, filma dhe opera.

Kur ka lindur Kleopatra?

Kleopatra VII Thea Filopatori ka lindur rreth vitit 70 ose 69 para erës sonë nga mbreti Ptolemeu XII dhe një nënë e panjohur.

Ku ka lindur Kleopatra?

Kleopatra ka lindur në Aleksandri, Egjipt.

Kur ka jetuar Kleopatra?

Kleopatra ka jetuar mes viteve 70/69 p.e.s. dhe 30 p.e.s. Gjatë kësaj periudhe, ajo konsolidoi gradualisht pushtetin ndaj vëllezërve dhe motrave të saj. Motra e saj më e madhe, Berenika IV (ose Berenice IV), u vra në vitin 55 p.e.s. pas një përpjekjeje të dështuar për t'i marrë pushtetin babait të tyre. Pas kësaj, Kleopatra u bë bashkëregjente me të atin. Kur ai vdiq në vitin 51 p.e.s., ajo u martua me vëllanë e saj më të vogël, Ptolemeun XIII, sipas zakonit të kohës. Më vonë, këshilltarët mbretërorë e detyruan djalin e ri ta dëbonte Kleopatrën në mërgim. Në këtë kohë, motra tjetër e Kleopatrës, Arsinoja IV, u përpoq të zinte vendin e saj.

Ishte vendosmëria e Kleopatrës për të rimarrë pushtetin që e shtyu atë të krijonte një aleancë strategjike me gjeneralin romak Jul Cezar. Aleanca e tyre politike u bë edhe lidhje seksuale, dhe në vitin 47 p.e.s., Kleopatra lindi një fëmijë që besohet të ketë qenë djali i Çezarit, Cezarioni.

Si dukej Kleopatra?

Edhe pse askush nuk e di me siguri se si dukej Kleopatra, ka disa dëshmi historike për pamjen e saj. Shkrimtarët romakë dhe grekë kanë shkruar për pamjen e saj, edhe pse nuk bien dakord nëse ajo ishte e bukur apo jo.

Kasius Dio, për shembull, shkroi se mbretëresha ishte "mahnitëse për t'u parë" dhe "një grua me bukuri të jashtëzakonshme". Ndërkohë, Plutarku shkroi se bukuria e saj "nuk ishte në vetvete e pakrahasueshme", por pranoi se ajo kishte hijeshi të jashtëzakonshme dhe "nxitëse".

Nga ana tjetër, monedhat e prera gjatë jetës së saj e tregojnë atë me flokë kaçurrela, hundë të harkuar dhe mjekër të dalë. Megjithatë, monedhat mund të jenë ndryshuar për ta bërë mbretëreshën të duket më romake.

A ishte Kleopatra egjiptiane?

Edhe pse familja e Kleopatrës kishte jetuar në Egjipt për shumë kohë, babai i saj ishte pasardhës i grekëve maqedonas që kishin pushtuar Egjiptin.

A ishte Kleopatra e zezë?

Është e pamundur që Kleopatra të ketë qenë e zezë, pasi babai i saj ishte grek, dhe sundimtarët ptolemeikë kishin zakon të martoheshin brenda familjes. Megjithatë, identiteti i nënës së saj është i panjohur, prandaj identiteti i saj racor nuk mund të përcaktohet me siguri të plotë sot.

Me kë u martua Kleopatra?

Kleopatra u martua me dy nga vëllezërit e saj, Ptolemeun XIII dhe Ptolemeun XIV, dhe më vonë u martua me gjeneralin romak Mark Antoni.

Ashtu si me Çezarin, Kleopatra krijoi një aleancë politike dhe romantike me Antonin. Pas takimit të tyre në vitin 41 p.e.s. dhe nisjes së marrëdhënies, ata patën tre fëmijë: binjakët Aleksandër Heliosi dhe Kleopatra Selene II, dhe Ptolemeun Filadelf.

Si vdiq Kleopatra?

Historia më e përhapur është se Kleopatra kreu vetëvrasje duke nxitur një nepërkë helmuese  që ta kafshonte në gjoksin e zbuluar.

Kur vdiq Kleopatra?

Kleopatra vdiq me 10 ose 12 gusht të vitit 30 p.e.s.

Sa vjeç ishte Kleopatra kur vdiq?

Ajo ishte 39 vjeç në kohën e vdekjes së saj.

Pse vrau veten Kleopatra?

Deri në gusht të vitit 30 p.e.s., Kleopatra ishte në një situatë pa dalje. Mark Antoni kishte kohë që ishte përfshirë në një luftë të humbur për pushtet kundër trashëgimtarit të Çezarit, Oktavianit, për kontrollin e Romës. Ndërkohë, Oktaviani e konsideronte Kleopatrën dhe djalin e saj Cezarionin, për të cilin ajo pretendonte se ishte trashëgimtari i vërtetë i Çezarit, si kërcënim për pushtetin e tij. Prandaj, ai i shpalli luftë mbretëreshës, dhe më pas e mposhti atë dhe Antonin në betejën vendimtare të Aktiumit në vitin 31 p.e.s.

Pasi forcat e Antonit u dorëzuan te Oktaviani në verën e vitit 30 p.e.s., Kleopatra u ngujua në një mauzole që e kishte ndërtuar brenda pallatit të saj në Aleksandri. Antoni, duke dëgjuar një thashethem të rremë se ajo kishte kryer vetëvrasje, e goditi veten për vdekje me thikë. Më pas, kur mësoi se ajo ishte ende gjallë, ai u zvarrit deri te ajo dhe vdiq në krahët e saj.

Kleopatra, e frikësuar se Oktaviani do ta kapte dhe do ta çonte në Romë për ta shfaqur si trofe lufte, vendosi të kryente vetëvrasje. Thuhet se ajo përdori një nepërkë, por disa historianë modernë mendojnë se ajo piu helm. Gjarpërinjtë janë shumë të pranishëm në mitologjinë egjiptiane, dhe vetëvrasja me nepërkë do të kishte qenë simbolike, sidomos pasi ky lloj gjarpri lidhej me mbretërinë. Por kjo mënyrë do të kishte qenë më e pasigurt, dhe më e dhimbshme.

Ndërkohë, disa historianë dyshojnë se Kleopatra mund të jetë vrarë në një atentat të orkestruar nga Oktaviani.

Çfarë ndodhi me fëmijët e Kleopatrës?

Pas vdekjes së Kleopatrës, djali i saj më i madh, Cezarioni, u vra nga njerëzit e Oktavianit. Tre fëmijët e tjerë, Aleksandër Heliosi, Kleopatra Selene II dhe Ptolemeu Filadelf, u kapën nga romakët dhe u dërguan në Romë (edhe pse Ptolemeu mund të ketë vdekur përpara se të arrinte). Në Romë, Oktaviani i detyroi binjakët të parakalonin në triumfin e tij ushtarak me zinxhirë të artë.

Më pas, binjakët u vendosën nën kujdesin e motrës së Oktavianit, ish-gruaja e Mark Antonit, Oktavia. Më tej, fati i Aleksandër Heliosit mbetet i panjohur. Kleopatra Selene II, megjithatë, u martua me Juba II, mbretin e Mauretanisë, duke u bërë mbretëresha e këtij vendi.

A është gjetur varri i Kleopatrës?

Jo, varri i Kleopatrës nuk është gjetur. Plutarku sugjeron se ai ndodhej në qendër të Aleksandrisë, ku ishin varrosur më parë faraonë të tjerë ptolemeikë. Ai gjithashtu përmend se ajo dhe Antoni u varrosën së bashku në një mënyrë "të shkëlqyer dhe mbretërore", por vendndodhja e saktë është humbur.

Është e mundur që varri të jetë shkatërruar nga katastrofa natyrore ose nga ndryshimet e vijës bregdetare të Aleksandrisë (një pjesë e qytetit të lashtë është tani nën ujë). Gjithsesi, kërkimet për varrin vazhdojnë ende edhe sot.  Allthatsinteresting - Syri net