Zbulohen detaje të reja për vrasjen e shkencëtarit iranian: Mitraloz me telekomandë dhe operacion 8-mujor nga Mossadi
Detaje të reja tronditëse kanë dalë në dritë për mënyrën se si u vra shkencëtari bërthamor iranian Mohsen Fakhrizadeh në vitin 2020, duke zbuluar përmasat teknologjike dhe organizative të një operacioni të sofistikuar që autoritetet iraniane ia atribuojnë shërbimit izraelit të inteligjencës, Mossad.
Sipas një raporti të fundit të Jerusalem Post, vrasja u krye me një mitraloz M240C me telekomandë, i kontrabanduar në Iran në pjesë dhe i montuar brenda tetë muajsh nga një ekip prej rreth 20 operativësh të Mossadit. Arma ishte e fshehur në një kamionetë blu të tipit Zamyad dhe kontrollohej nga distanca për të shmangur viktima të tjera, përfshirë gruan e Fakhrizadeh që ndodhej në automjetin e tij gjatë atentatit.
Sipas burimeve izraelite të inteligjencës, arma u aktivizua kur Fakhrizadeh ndodhej në makinën e tij në një rrugë në Teheran më 27 nëntor 2020. Ai u qëllua fillimisht brenda automjetit, dhe pasi doli për të shpëtuar, u qëllua përsëri derisa humbi jetën. Një automjet tjetër i pajisur me kamera ishte pozicionuar më herët për të verifikuar identitetin e shënjestrës. Informacioni i ri përputhet me deklaratat e bëra që në atë kohë nga zyrtarët iranianë, përfshirë Gjeneral Major Ali Shamkhani, i cili tha se operacioni ishte ekzekutuar me një mitraloz të kontrolluar përmes një lidhjeje satelitore.
Edhe pse Izraeli nuk ka marrë kurrë zyrtarisht përgjegjësinë për atentatin, besohet gjerësisht se vrasja e Fakhrizadeh, një figurë kyçe në programin bërthamor të Iranit, ka ndikuar ndjeshëm në frenimin e përparimit të Teheranit drejt aftësive bërthamore. Irani e shpalli shkencëtarin “martir” dhe i organizoi një funeral shtetëror me nderime të larta.
Raportimet iraniane sugjerojnë se Mossadi kishte planifikuar vrasjen e tij që në vitin 2009, por debate të brendshme për fizibilitetin e operacionit e shtynë vendimin deri në vitin 2020, kur ai mendohej të ishte ende me ndikim strategjik dhe në kontakt të drejtpërdrejtë me liderin suprem, Ajatollah Ali Khamenei. Operacioni besohet se ka rritur reputacionin ndërkombëtar të Mossadit për aftësi të avancuara në operacionet e fshehta dhe ndërhyrjet në territorin iranian.