Apeli i GJKKO lë në fuqi dënimin me 25 vite burg për Gjergj Cukalin

Gjykata e Posaçme e Apelit ka lënë në fuqi vendimin e dënimit me 25 vite burg për Gjergj Cukalit, ndërsa ndryshoi pjesërisht vendimin për bashkëpunëtorin e Drejtësisë Enver Jamakun e Blendi Dedën.

Për Jamakun dënimi zbret nga 8 në 7 vite, ndërsa për Dedën nga 22 vite në 18 vjet burgim. Cukali është dënuar me 25 vite burg për akuzat, vrasje në tentativë ndaj Gjon Menës, shkatërrim prone me eksploziv, armëmbajtje pa leje dhe grup i strukturuar kriminal. 

Gjergj Cukali i njohur me nofkën “i forti i Myslym Shyrit” është gjetur fajtor edhe për vrasjen e mbetur në tentativë të Artion Bylykut. Kujtojmë se Enver Jamaku u gjet fajtor  për futje sendesh në banesën e Edmond Jamaku, kanosjes së avokatit Paulin Paplekaj dhe gjetjen të magazinuara të armëve luftarake në ambientet e Sokol Xhurës, si bashkëpunetor i të parëve në grup të strukturuar kriminal.

Vendimi mbetet në fuqi për Flor Abazin I cili  u dënua me 22 vjet dhe Paris Prenga 21 vjet, që u arrestuan në kuadër të operacionit “Kompleksi”, ku u zbuluan 18 baza armatimi në Tiranë.