Afrika, e detyruar të ndalojë migrantët që arrijnë në Evropë për të mbajtur paratë e BE-së

Vendet afrikane do të duhet të ndalojnë largimet e migrantëve nëse duan të vazhdojnë të marrin ndihmën për zhvillim të BE-së, do të sugjerojë Komisioni Evropian si pjesë e planit të tij buxhetor shtatëvjeçar që do të zbulohet javën e ardhshme.

Ideja, e cila është përshkruar në një draft dokument të brendshëm të parë nga POLITICO, lidh ndihmën e BE-së për vendet më të varfra, me rezultate konkrete në parandalimin e njerëzve që vijnë në bllok.

Kjo pasqyron qasjen e ashpër të ekzekutivit të BE-së ndaj migracionit, pasi partitë e krahut të djathtë siguruan mbështetje të konsiderueshme në zgjedhjet evropiane të vitit të kaluar. Ky ndryshim do të shihte që agjenda e zhvillimit e BE-së të përafrohej me atë të SHBA-së dhe Mbretërisë së Bashkuar, të cilat të dyja përdorin ndihmën e huaj, si levë për të përmbushur prioritetet e votuesve vendas.

Në plan, Komisioni sugjeron shkurtimin e fondeve për vendet më të varfra, nëse ato nuk luajnë rolin e tyre në uljen e flukseve të migracionit.

“Do të kombinojë të gjitha mjetet e përshtatshme dhe ndikimin e nevojshëm përmes një qasje fleksibile nxitëse me, sipas rastit në këtë kontekst, ndryshime të mundshme në ndarjen e fondeve që lidhen me migracionin”, shkroi Komisioni në dokumentin që paraqet planin e tij për ndihmën e huaj në ciklin e ri buxhetor, i cili mbulon shtatë vitet nga viti 2028.

Duke vepruar kështu, Presidentja e Komisionit Ursula von der Leyen po i nënshtrohet presionit nga Partia e saj Popullore Evropiane e qendrës së djathtë dhe shumica e vendeve që shtrihen nga Italia deri në Danimarkë.

Ata janë të etur të replikojnë dhe zgjerojnë marrëveshjen kontraverse të vitit 2023 të BE-së me Tinizinë, për të ndaluar largimet e migrantëve edhe drejt vendeve të tjera afrikane.

“Nevojitet një koherencë më e madhe midis migracionit, azilit dhe politikave të jashtme për të siguruar që ndihma e jashtme e Bashkimit të mbështesë vendet partnere për të menaxhuar migracionin në mënyrë më efektive”, thuhet në dokument.

Megjithatë, që këto ide të hyjnë në fuqi, von der Leyen do të duhet të bindë skeptikët te Socialistët dhe Demokratët e majtë dhe te të Gjelbrit, mbështetja e të cilëve është e nevojshme për të miratuar buxhetin e ri në Parlamentin Europian.

Ky do të ishte një ndryshim i madh nga modeli aktual i ndihmës i BE-së, i cili kryesisht vjen pa kushte të bashkangjitura.

Von der Leyen do të zbulojë propozimin e buxhetit të mërkurën e ardhshme.

Çështja e Ukrainës

Komisioni do të propozojë bashkimin e disa programeve të ndryshme të ndihmës, në një Fond të vetëm për Evropën Globale, të ndarë sipas kategorive gjeografike.

Gjashtë rajonet do të jenë Evropa; Lindja e Mesme, Afrika e Veriut dhe Gjiri; Afrika Sub-Sahariane; Azia dhe Paqësori; Amerika dhe Karaibet; dhe globale, sipas tekstit.

Komisioni do të ndajë një shumë specifike parash për secilën makro-zonë. Megjithatë, shifrat janë hequr nga dokumenti dhe do të ndahen brenda vendit, vetëm disa orë para se Komisioni të zbulojë propozimin e tij.

Paratë për rindërtimin e Ukrainës pas luftës nuk do të pakësojnë fondet për rajonet e tjera.

Dokumenti sugjeron që në vend të kësaj do të ketë një fond të veçantë dhe të pacaktuar parash për t'i shërbyer vendit të shkatërruar nga lufta nga viti 2028 deri në vitin 2034.  

“Instrumenti duhet të ofrojë kornizën për ndihmë për rimëkëmbjen e shpejtë, rindërtimin dhe modernizimin e vendit”, thuhet në dokument./ Politico.