‘Nga 1 Gushti’/ Trump njofton tarifën prej 25% për dy nga partnerët tregtarë të SHBA, Japoninë dhe Korenë e Jugut

Presidenti Donald Trump shtoi presionin mbi dy nga partnerët kryesorë tregtarë të Amerikës, Japoninë dhe Korenë e Jugut, duke u dërguar letra të hënën krerëve të vendeve të tyre me të cilat i informonte ata për normën e re tarifore.

Të dy vendet do të përballen me një tarifë prej 25% që nga 1 gushti, tha Trump në  postimet në Truth Social ku shfaqën letrat, duke u dhënë potencialisht vendeve më shumë kohë për të negociuar marrëveshje.

Në dy letrat pothuajse identike, Trump tha se ai e ka veçanërisht problem deficitin tregtar që Shtetet e Bashkuara kanë me të dy vendet, që do të thotë se Amerika blen më shumë mallra prej andej, krahasuar me sasinë që bizneset amerikane eksportojnë në ato vende. Trump tha gjithashtu se tarifat do të vendosen në përgjigje të politikave të tjera, që ai i konsideron se po pengojnë shitjen e mallrave amerikane jashtë vendit.

“Ju lutem kuptoni që numri prej 25% është shumë më i vogël, se ai që nevojitet për të eliminuar hendekun e deficitit tregtar që kemi me vendin tuaj”, shkruan Trump në të dyja letrat.

Ai i inkurajoi të dy vendet të prodhonin mallra në Shtetet e Bashkuara, për të shmangur tarifat.

“Nuk do të ketë tarifë” nëse Koreja e Jugut ose Japonia ose “kompanitë brenda vendit tuaj vendosin të ndërtojnë ose prodhojnë produkte brenda Shteteve të Bashkuara dhe, në fakt, ne do të bëjmë gjithçka që është e mundur për të marrë miratimet shpejt, profesionalisht dhe në mënyrë rutinore - Me fjalë të tjera, brenda pak javësh”, shtoi ai.

Trump kërcënoi gjithashtu të rriste tarifat mbi 25% nëse Koreja e Jugut ose Japonia do të hakmerreshin kundër Shteteve të Bashkuara me tarifat e tyre.

“Nëse për ndonjë arsye vendosni të rrisni tarifat tuaja, atëherë, pavarësisht numrit që zgjidhni t’i rrisni ato, do t’i shtohet 25% që ne aplikojmë”, tha gjithashtu Trump.

Trump ka kërcënuar se do t'u dërgojë më shumë letra krerëve të vendeve, përpara afatit të tij të 9 korrikut, në orën 12:01 të mëngjesit sipas kohës lindore, për të bërë marrëveshje ose përndryshe do të përballen me kërcënimin e tarifave më të larta. Kjo datë shënon fundin e pauzës së tarifave "reciproke", e cila hyri në fuqi për një kohë të shkurtër në prill.

Japonia do të përballej me një tarifë prej 24%, ndërsa Koreja e Jugut do të përballej me një tarifë prej 25%. Trump tha se këto tarifa do të ishin "të ndara nga të gjitha Tarifat Sektoriale", që do të thotë, për shembull, se makinat nga të dy vendet, të cilat aktualisht përballen me tarifa prej 25%, nuk do të grumbullohen njëra mbi tjetrën dhe nuk do t'u ngarkohet një taksë e kombinuar prej 50%, konfirmoi Shtëpia e Bardhë. Kjo do të vlente edhe për çdo tarifë specifike sektoriale në të ardhmen, tha një zyrtar i Shtëpisë së Bardhë.

“Këto tarifa mund të modifikohen, lart ose poshtë, varësisht nga marrëdhënia jonë me vendin tuaj. Ju kurrë nuk do të zhgënjeheni nga Shtetet e Bashkuara të Amerikës”, përfundoi Trump letrat para nënshkrimit.

Aksionet amerikane, të cilat tashmë po binin, ranë më poshtë pas njoftimit të Trump. Indeksi Dow ra deri në 530 pikë, ose 1.2%. S&P 500 ra me 0.87% dhe Nasdaq ra me 0.9%./ CNN.