Ukraina godet me dronë: Putin shkarkon Ministrin e Transportit pas anulimeve masive të fluturimeve

Presidenti rus Vladimir Putin ka shkarkuar Ministrin e Transportit, Roman Starovoit, pas ndërprerjeve të rënda në hapësirën ajrore civile ruse të shkaktuara nga sulmet me dronë të Ukrainës gjatë fundjavës. Sipas agjencisë federale të aviacionit, Rosaviatsiya, të shtunën dhe të dielën janë anuluar 485 fluturime, ndërsa rreth 1,900 të tjera janë vonuar për shkak të kufizimeve ajrore në aeroportet e Rusisë qendrore.

Kremlini nuk dha një arsye të qartë për shkarkimin e Starovoit, i cili u emërua ministër vetëm në maj 2024, por masa vjen mes kostove të rënda financiare dhe kaosit në transportin ajror. Media shtetërore “Komersant” raportoi se kompanitë ajrore kanë humbur mbi 200,000 euro nga ndërprerjet.

Ukraina ka intensifikuar sulmet me dronë ndaj objektivave ushtarake ruse, përfshirë bazën ajrore Borisoglebsk në rajonin e Voronezhit, ku besohet se janë të vendosur avionë luftarakë Su-34, Su-35S dhe Su-30SM. Gjatë natës së së dielës, Rusia raportoi se kishte rrëzuar 8 nga 90 dronë që fluturuan mbi territorin rus, Detin e Zi dhe Krimenë e aneksuar.

Kjo nuk është hera e parë që dronët ukrainas godasin trafikun ajror rus. Në fillim të majit, rreth 350 fluturime u ndërprenë në aeroportet e Moskës vetëm disa ditë para paradës së Ditës së Fitores.