Protestë në fshatin Shën Pjetër, Durrës: Banorët kërkojnë ujë të pijshëm, bashkia prej vitesh ka mungesë investimesh

Banorët e fshatit Shën Pjetër në Durrës kanë protestuar ditën e sotme për shkak të mungesës së ujit të pijshëm, një problem që ka zgjatur për shumë kohë.

Rreth 60 familje të këtij fshati janë ngritur në protestë për të kërkuar vëmendjen e autoriteteve lokale, pasi vazhdojnë të përballen me vështirësi të mëdha për sigurimin e ujit të pijshëm.

Ata kanë kërkuar ndihmë nga Bashkia e Durrësit, por përgjigjja që kanë marrë deri tani ka qenë se nuk ka fonde për realizimin e investimeve të nevojshme. Sipas banorëve, Bashkia ka thënë se ata duhet të financojnë vetë punimet për të siguruar ujë të pijshëm, një kërkesë që ata e konsiderojnë të padrejtë.

Ndërkohë, situata është edhe më shqetësuese, pasi në disa rrugë të fshatit, uji derdhet në kanale dhe banorët janë të detyruar të bëjnë çmos për të siguruar ujë të pijshëm.

Ky problem, sipas tyre, ka vazhduar për një kohë të gjatë dhe ata thonë se kanë kërkuar disa herë ndihmë nga instancat përkatëse, por ende nuk kanë marrë asnjë përgjigje konkrete.

Banorët shprehen:

"Në lagjet tona nuk ka pasur kurrë ujë të pijshëm dhe kjo ka krijuar një situatë të padurueshme për ne. Kërkojmë nga shteti që të furnizohemi me ujë të pijshëm, siç ndodh në zonat e tjera që kanë linja të miratuara dhe të realizuara.

Të gjitha zonat e tjera kanë ujë të pijshëm me linjë të mirëfilltë, por ne këtu, në fshatin Shën Pjetër, nuk kemi. Na janë bërë vetëm premtime boshe, ndërsa investimet janë realizuar në mënyrë të dyshimtë dhe janë shpërndarë për fushata, e jo për të zgjidhur problemet reale të qytetarëve.

Ne nuk kemi fare linjë për ujë të pijshëm dhe kjo ka krijuar një situatë të pashpresë për shumë familje. Kërkojmë që të merren masa urgjente, përndryshe jemi të detyruar të bllokojmë aksin kryesor të rrugës dhe të kërkojmë drejtësinë tonë me çdo mënyrë të mundshme."

Banorët shprehen se ndihen të dëshpëruar nga mungesa e reagimit të autoriteteve dhe ndihen të braktisur, ndërkohë që situata e mungesës së ujit të pijshëm është bërë një problem serioz për jetën e përditshme të tyre.

Ata kërkojnë një angazhim më të madh dhe investime reale për të përmirësuar kushtet e jetesës dhe për t’i dhënë fund një herë e mirë këtij problemi që ka ndikuar drejtpërdrejt në shëndetin dhe mirëqenien e tyre.