Prishtinë, dënohen me burg për drogë tre shtetas të Shqipërisë/ Emrat

Gjykata Themelore në Prishtinë i dënoi si fajtorë Arjanit Jahirin, Leonard Çukën, Ismir Shiqerukajn dhe Ylber Sadrijën për blerje, posedim, shpërndarje dhe shitje të paautorizuar të substancave psikotrope dhe analoge.

Jahiri u dënua me burg në kohëzgjatje prej 2 vitesh dhe dënim me gjobë në vlerë prej 1,500 euro.

Ndërsa, Çuka, Shiqerukaj dhe Sadrija u dënuan me burg 1 vit e gjashtë muajsi dhe dënim me gjobë në shumë prej 1,000 euro.

Ndërkaq, kryetarja e trupit gjykues, Valbona Selimaj, bëri të ditur se Renald Datja është liruar nga akuza në mungesë të provave dhe atij do t’i ndërpritet masa e paraburgimit.

Më tej, gjyqtarja Selimaj tha se do të konfiskohen të gjitha sendet e sekuestruara, përveç të liruarit Datja të cilit do t’i kthehet telefoni, si dhe të akuzuarit Sadrija do t’i kthehet makina.

Në këtë proces gjyqësor, Arjanit Jahiri, shtetas i Kosovës, dhe Leonard Çuka, Ismir Shiqerukaj, Ylber Sadrija e Renald Datja, shtetas të Shqipërisë, akuzohen se kanë shpërndarë, shitur, transportuar, ndërmjetësuar dhe dorëzuar substanca të cilat janë të shpallura me ligj si lëndë narkotike.

Sipas aktakuzës, më 26 mars 2016, pas ndalimit dhe kontrollit në makinën e të pandehurit Leonard Çuka, në të cilën pasagjer ishte edhe Renald Datja, Policia ka gjetur në gomën rezervë një sasi prej 1867 gramë narkotik të llojit marihuanë, si dhe afër frenit të dorës një sasi prej 1.4 gram marihuanë. /kallxo.com