Trump punëson avokatin e famshëm njujorkez për hetimet ndaj Rusisë
Donald Trump ka emëruar avokatin Marc Kasowitz që ta përfaqësojë atë në hetim mbi ndërhyrjet e supozuara të Rusisë në zgjedhjet presidenciale, raportojnë mediat amerikane.
Trump ka përdorur shërbimin e avokatit të njohur njujorkez për më shumë se një dekadë.
Javën e kaluar, ish-drejtori i FBI-së, Robert Mueller, u emërua këshilltar special për hetimin e Departamentit të Drejtësisë.
Presidenti Trump mohon ndonjë bashkëpunim midis stafit të tij të fushatës dhe Rusisë.
Megjithatë, agjencitë e inteligjencës amerikane besojnë se Moska u përpoq të ndërhynte në zgjedhjet e vitit 2016 në favor të zotit Trump.
Kasowitz dhe Shtëpia e Bardhë deri më tani nuk kanë bërë asnjë koment publik për emërimin e raportuar. /SYRI.net/