Kosovë, së paku 25 kandidatë për deputetë me akuza ose nën hetime

Në listat zgjedhore të subjekteve politike do të garojnë së paku 25 kandidatë për deputetë, të cilët kanë aktakuza të ngritura nga Prokuroria ose janë nën hetime për vepra të ndryshme penale, shkruan sot gazeta “Zëri”.

Kështu, partitë politike që marrin pjesë në zgjedhjet e 11 qershorit e shpërfillim iniciativën e Presidentit Hashim Thaçi për dekriminalizimin e skenës politike në vend.

Presidenti Thaçi pati deklaruar se do ta mbështesë çfarëdo nisme që në listat zgjedhore të mos ketë njerëz të akuzuar.

Një iniciativë të tillë e kanë mbështetur diplomatët e huaj. Ambasadori amerikan Greg Delawie vazhdon akoma të bëjë thirrje që në listat zgjedhore të mos përfshihen njerëz të ndjekur nga drejtësia.

“Është e rëndësishme që të gjitha partitë politike të kenë parasysh kë e përfshijnë në listat e tyre të kandidatëve dhe të zgjedhin njerëz që mund të frymëzojnë rininë e Kosovës dhe që vënë në rend të parë interesat më të mira të Kosovës dhe të qytetarëve të saj”, pati deklaruar Delawie ditë më parë.

Pavarësisht prej kësaj kërkese, në listat e partive politike pritet të jenë një numër i madh i deputetëve të legjislaturës së fundit, që kanë probleme me ligjin dhe janë të akuzuar për vepra penale,.

Kjo, siç shkruan “Zëri”, po ndodh pasi Kosova ende nuk ka ligj, i cili ua ndalon këtyre personave të kandidojnë për deputetë.