Blinken dhe gruaja e tij, emaile të vazhdueshme me Hunter Biden, pikëpyetje për rolin në historinë e laptopit

Sekretari i Shtetit Antony Blinken zhvilloi një takim me Hunter Biden në Departamentin e Shtetit në korrik 2015 kur ai shërbente si zëvendëssekretar i Shtetit në administratën Obama-Biden dhe Hunter ishte në bordin e firmës ukrainase të energjisë Burisma, sipas emaileve të shqyrtuara dhe verifikuara nga Fox News Digital.

Lidhjet midis Blinken dhe Hunter Biden mund të përballen me një kontroll të shtuar pasi ish-zëvendësdrejtori i CIA-s, Michael Morell, dëshmoi në Komitetet e Gjyqësorit dhe Inteligjencës në Dhomën e Përfaqësuesve javën e kaluar se Blinken, si këshilltar i lartë i fushatës së atëhershme të Presidentit Biden, "ka luajtur një rol në fillimin" e deklaratës publike të nënshkruar nga zyrtarë të inteligjencës duke pretenduar se laptopi i braktisur i Hunterit ishte pjesë e një fushate dezinformimi ruse vetëm disa javë përpara zgjedhjeve presidenciale të vitit 2020.

Emailet nga laptopi i braktisur që Blinken kërkoi të diskreditonte tregojnë se Hunter ka lidhje me Blinken dhe gruan e tij, Evan Ryan, që datojnë prej më shumë se një dekadë, pasi kishte planifikuar takime me të ndërsa ai ishte në bordin e Burismas dhe Blinken ishte zëvendëssekretar i Shtetit.

Në një email më 22 maj 2015, Hunter u përpoq të planifikonte një takim me Blinken, në mënyrë që t’i kërkonte “këshilla” zëvendëssekretarit të shtetit për disa gjëra.

“Keni disa minuta javën tjetër për një kafe?”, e pyeste Hunter. “E di që jeni jashtëzakonisht i zënë, por do të doja t’ju kërkoja këshilla për disa gjëra”.

“Absolutisht”, u përgjigj Blinken. “Po bëhem gati të zbres në Tokio në rrugën e kthimit në Washington nga Burma. Do jem në zyrë nga e marta e tutje. Po ia dërgoj Lindës në zyrën time për të gjetur kohën e përshtatshme. Mezi pres të shihemi. Toni”.

Hunter më pas përcolli përgjigjen e Blinken partnerit të tij të biznesit dhe anëtarit të bordit të Burisma, Devon Archer.

“Roger”, u përgjigj Archer.

Më pas pasuan disa emaile që diskutonin për logjistikën. Një email nga asistentja e atëhershme e Blinken, Linda Landers, më 27 maj 2015, renditi orarin e Blinken për atë ditë.

“Po përpiqem t'ju planifikoj pas takimit të pasdites së Tonit në Shtëpinë e Bardhë, a jeni në dispozicion rreth orës 3:45 apo 4 pasdite?”, shkruante Landers. “A mund të vini në Departament për kafe dhe të shihni gjërat e tij të reja?”

“Besoj se po, më njoftoni dhe do të jem kudo që është më e lehtë për të”, u përgjigj Hunter. Hunter gjithashtu përcolli një përgjigje nga ndihmësi i Blinken për Archer, që thoshte "FYI".

Takimi në Departamentin e Shtetit fillimisht ishte caktuar për në orën 15:30. dhe më pas u zhvendos në 4 pasdite, më 27 maj 2015. Por në kohën e emaileve, vëllai i madh i Hunterit, Beau Biden, ishte shtruar në Qendrën Mjekësore Ushtarake Kombëtare Walter Reed në Maryland për shkak të një përsëritjeje të kancerit të trurit. Beau vdiq më 30 maj 2015 dhe takimi midis Hunter dhe Blinken thuhet se nuk u zhvillua në atë kohë.

Sidoqoftë, takimi u caktua më vonë për 22 korrik 2015, sipas një plani të dërguar me email nga ndihmësi i Hunter Biden.

“12:00-1:30 pm - Dreka me Tony Blinken (Departamenti i Shtetit)”, shkruhej në axhendën e Hunterit. “Hyni në hyrjen kryesore (Hyrja Diplomatike), 22nd & C St, NW. Vazhdoni në zonën e recepsionit ku Kenny Matthews do t’ju presë për t'ju shoqëruar në zyrën e Tonyt”.

Po atë ditë, Blinken i shkruante Hunterit në një email se ishte “ishte gjë e mirë që do shiheshin e do bisedonin për të rejat me njëri-tjetrin”.

“Kjo ka për të pëlqyer”, i shkruante Blinken Hunterit më 22 korrik 2015. “Pasi ike, Marjorie, gruaja e mrekullueshme afrikano-amerikane në paradhomën e zyrës sime (dhe dikur ishte asistentja e Colin Powell) më tha për ty ‘është simpatik’. Thuaja gruas”.

Është e paqartë se çfarë u diskutua gjatë takimit. Pyetjet e Fox News Digital dërguar Shtëpisë së Bardhë, avokatit të Hunter dhe Departamentit të Shtetit të dielën nuk morën përgjigje.

Duket se Hunter fillimisht u përpoq të lidhej me Blinken më 16 qershor 2010, kur ai i kërkoi gruas së Blinkenit, tani sekretare kabineti në Shtëpinë e Bardhë, Evan Ryan, adresën e emailit privat.

“A mund të më japësh emailin joqeveritar të Tonit?”, e pyeti Hunter. “Dua t'i dërgoj diçka. Faleminderit”.

Ryan, e cila në atë kohë punonte në Shtëpinë e Bardhë dhe më vonë shkoi të punonte në Departamentin e Shtetit, sipas profilit në LinkedIn, më pas i dha Hunterit adresën personale të Blinkenit. Ajo ka punuar më parë për Biden si zëvendësmenaxhere e fushatës së tij gjatë garës së pasuksesshme presidenciale midis 2007 dhe 2008.

Në mars 2010, partneri i vjetër në biznes i Hunter Biden, Eric Schwerin, i dërgoi email Hunterit për disa evente në Shtëpinë e Bardhë dhe shkruante se “kishte folur me Evan”, duke iu referuar Evan Ryan, për to dhe se sa bileta do të jepte Zyra e Zëvendës Presidentit për të ftuarit.

“ZZP ka 250 bileta për festën e Pashkëve dhe mamaja juaj ka edhe 200 të tjera. Familja, etj, do të jetë nga pjesa e mamasë suaj”, shkruante Schwerin në një email për. “Evan po merret me pjesën e babait tuaj dhe mund t’ia kalojmë asaj emrat për qëllime kontaktimi. Flasim. Nuk mendoj se kemi 50 vende, por nëse do të kishim diçka aty te 20 emra besoj se jemi në rregull”.

“Më e rëndësishmja, ZZP ka 12 vende të lira për Drekën Shtetërore për Meksikën në maj dhe emrat i do deri të hënën”, vazhdon. “Evan po kërkon sugjerime. Amerikanë hispanikë apo edhe sugjerime të tjera që kanë lidhje. Kuptohet që s’do ta kenë problem të plotësojnë numrin, por ende po kërkon sugjerime”.

Disa muaj më vonë, Hunter dhe Ryan shkëmbyen email në lidhje me listën e të ftuarve të darkës dhe ajo i dërgoi skemën e karrigeve për tryezën e tij.

Në gusht 2010, Ryan i dërgoi email Hunterit ku e pyeste nëse ai ishte ende në New York City, duke e shtyrë Hunter të thoshte se ishte në "zyrën në TriBeCa" dhe se do të kthehej në shtëpi me tren në darkë. 

“Tony po vjen këtej, do të hamë darkë me prindërit e tij. Më vjen shumë keq që e fshiva mesazhin tuaj, kur Danielle më tha se kishte gjetur një numër telefoni për ju, mendova se kjo ishte arsyeja pse po telefononit”, shkruante Ryan. “Kthehemi javën tjetër, a jeni për darkë”? Është e paqartë nëse ata u takuan për darkë kur u kthyen në Washington.

Po atë vit, në tetor, Ryan i dërgoi email Hunterit dhe partnerit të tij të biznesit, Eric Schwerin, duke i kërkuar Hunterit ta telefononte kur të zbriste, duke vënë në dukje se ajo e dinte se ai ishte në udhëtim.

Më vonë atë muaj, regjistrat e vizitorëve të Shtëpisë së Bardhë tregojnë se Schwerin u takua me Ryan në ndërtesën e vjetër të zyrës ekzekutive të Shtëpisë së Bardhë (OEOB).

Në një email të qershorit 2011 me temën "Party", Schwerin i dërgon email Hunterit duke thënë: "Vendose Evan Ryan si ‘po’ për të enjten. Edhe Tony-n besoj”. Është e paqartë se cilës "party" i referohej emaili. 

Një muaj më parë, Schwerin i dërgoi e-mail asistentes së Hunter dhe Rosemont Seneca Partners, Anne Marie Person, duke i kërkuar asaj që "të vendoste drekën me Evan Ryan për të mërkurën". Është e paqartë nëse dreka ka ndodhur dhe çfarë mund të jetë diskutuar.

Në vitin 2013, Hunter Biden mori pjesë në një event libri në Cafe Milano, një institucion i Georgetown i frekuentuar shpesh nga udhëheqës politikë, ambasadorë, lobistë, etj. Sipas një albumi të Flickr nga nëntori 2013, eventi i librit ishte për Clint Hill, një ish-agjent i Shërbimit Sekret fama e të cilit vjen nga të qenit agjenti i parë që reagoi ndaj vrasjes së Presidentit John F. Kennedy, duke u hedhur nga një makinë pas limuzinës së Kenedit dhe duke vrapuar drejt limuzinës së tij. Albumi fotografik përfshin një fotografi të Hunter Biden, Evan Ryan, Hill dhe ish-ambasadorit Lloyd Hand.

Në korrik të vitit 2016, Joan Mayer, e cila thotë se ishte nënkryetare e firmës së investimeve tashmë të mbyllur të Hunterit, Rosemont Seneca Advisors, nga 2008 deri në 2017, i dërgoi email Schwerinit e Hunterit ku shkruante se Ryan u përpoq të telefononte Hunterin, por telefonata shkoi në postë zanore.

Zbulimet e lidhjeve të Hunter me Blinken dhe gruan e tij vijnë mes Kryetarit të Komitetit Gjyqësor të Dhomës së Përfaqësuesve, Jim Jordan, R-Ohio, dhe Kryetarit të Komitetit të Zbulimit të Dhomës së Përfaqësuesve, Mike Turner, R-Ohio, të cilët i shkruan një letër Blinkenit të enjten e kaluar, duke e njoftuar atë se komisionet janë "duke shqyrtuar atë deklaratë publike të nënshkruar nga 51 ish-zyrtarë të inteligjencës që diskredituan në mënyrë të rreme një histori të New York Post në lidhje me laptopin e Hunter Biden si dezinformim i supozuar rus”.

“Në intervistën e tij të transkriptuar, Morell dëshmoi se më ose rreth 17 tetorit 2020, ju kontaktuat me të për të diskutuar historinë e laptopit të Hunter Biden", shkruan ata. "Sipas Morellit, megjithëse kontakti juaj u shpreh si thjesht mbledhja e reagimit të Morellit ndaj historisë së Postës, ajo vuri në lëvizje ngjarjet që çuan në lëshimin e deklaratës publike".

"Morell shpjegoi më tej se një nga dy qëllimet e tij në lëshimin e deklaratës ishte të ndihmonte zëvendëspresidentin e atëhershëm Biden në debat dhe ta ndihmonte atë në fitoren në zgjedhje", shkruan ata. “Bazuar në dëshminë e Morellit, është e qartë se fushata e Bidenit luajti rol aktiv në origjinën e deklaratës publike, e cila kishte efektin e ndihmës në mbylljen e historisë së Hunter Biden dhe pengimin e qytetarëve amerikanë që të merrnin një vendim plotësisht të informuar gjatë zgjedhjeve presidenciale 2020”.

Morell tha edhe se ai mori një telefonatë nga këshilltari i Bidenit në Shtëpinë e Bardhë, Steve Ricchetti, i cili shërbente si kryetar i fushatës 2020 në atë kohë, pas debatit të 22 tetorit. Morell tha se thirrja ishte për ta falënderuar atë për drejtimin e letrës.

Jordan dhe Turner i dhanë kohë Blinkenit deri më 4 maj për të identifikuar njerëzit me të cilët ai komunikoi për hartimin e deklaratës dhe për të paraqitur të gjitha dokumentet që i referohen deklaratës.

Ndërkohë, Shtëpia e Bardhë iu kundërpërgjigj Republikanëve në Kongres për hetimin e çështjes.

“Në vend që të punojnë me Presidentin Biden për çështjet që kanë më shumë rëndësi për popullin amerikan, si ulja e kostove apo lufta kundër dhunës me armë, Republikanët në Dhomën e Përfaqësuesve po e përdorin pushtetin për të përndjekur kundërshtarët e tyre politikë dhe për të rindërtuar zgjedhjet e vitit 2020 me pretendime mashtruese”, tha Ian Sams, zëdhënësi i Shtëpisë së Bardhë, për Fox News Digital. “E gjithë kjo po ndodh teksa ata ecin përpara në një plan të rrezikshëm për ta shtyrë Amerikën në falimentim dhe krizë ekonomike”.

Sams shtoi: "Populli amerikan i sheh këto sulme të Republikanëve të Dhomës së Përfaqësuesve ashtu siç janë në të vërtetë: marifete politike që synojnë të dëmtojnë Presidentin Biden dhe Republikanët e Dhomës së Përfaqësuesve do të bënin mirë që në vend të kësaj të fokusoheshin në kryerjen e punës së tyre, duke rritur tavanin e borxhit për të shmangur një katastrofë ekonomike dhe duke punuar së bashku me Presidentin për të bërë përparim real në çështje të rëndësishme”.

Përshtati: Syri.net