VIDEO/ Asnjë i ndaluar për tentativën për eliminimin e Benard Ndrecës! Në makinë iu vendos 50 gramë tritol

Gjashtë persona janë shoqëruar përgjatë 24 orëve të fundit për ngjarjen e rëndë që tronditi Shkodrën mëngjesin e së martës.

Sipas të dhënave, bëhet me dije se personat janë kontingjent i skeduar disa herë e për pasojë ata janë marrë në pyetje për rrethanat e ngjarjes dhe më pas janë lënë të lirë. Po ashtu, duke iu referuar pamjeve filmike të momentit kur shfaqen dy personat që instalojnë lëndën plasëse poshtë mjetit të Benard Ndrecës, grupi hetimor është përpjekur të krijojë edhe një identikit të përafërt me pamjen fizike që kanë kapur kamerat e banesës së familjes Ndreca. Por ende nuk është bërë e mundur as të shkohet te ndonjë i dyshuar për aktin e rëndë, me anë të të cilit u tentua eliminimi fizik i kreut të Partisë Demokratike të Vaut të Dejës, ndërsa një sasi tritoli shpërtheu teksa Ndreca nisi mjetin e tij.

Hetimet

Ekspertët kanë përcaktuar se ka qenë një sasi prej 50 gramë lëndë eksplozive që është vendosur në mjetin e 35- vjeçarit Benard Ndreca. Ky është konkluzioni i arrirë nga forcat xhenio pas eksperimentimit të mjetit që shpërtheu në momentin që Benard Ndreca i dha makinës. Në lidhje me ngjarjen e rëndë të dy ditëve më parë, ku Benard Ndrecës iu bë një atentat me tritol në mjetin e tij, në Policinë e Shkodrës janë shoqëruar 6 persona, ndërkohë ende nuk ka të ndaluar për shpërthimin me eksploziv. Grupi i ekspertizës po analizon në detaje mjetin e Ndrecës për të rënë në gjurmët e 2 autorëve që u panë në momentin që montuan lëndën plasëse. Sidoqoftë, shanset janë të pakta për shkak të shpërthimit.

Grupi hetimor ka sekuestruar dhe kamera të tjera të sigurisë në zonë për të parë lëvizje të autorëve pasi janë larguar nga banesa e Ndrecës. Ende dyshimet janë të forta që mjeti mund të jetë shpërthyer me telekomandë. Benard Ndreca, në një prononcim për mediat, u shpreh se nuk ka konflikte me askënd dhe se ky është një sulm i hapur politik. Ndreca bëri thirrje që politika të distancohet dhe bashkë me Policinë të lënë qytetarët të lirë të votojnë. Grupi i posaçëm hetimor ka marrë dëshmi edhe të familjarëve të Ndrecës për të mësuar ndonjë hollësi që lidhen me ndonjë dyshim apo konflikt, ndonëse familja Ndreca janë banorë të Pacramit dhe jetojnë me njerëzit e tyre aty, çka përjashton konfliktet për shkaqe banale që mund të pretendohet nga ana e Policisë.

Ngjarja

Atentati ndaj Benard Ndrecës në Paçram të Vaut të Dejës, që ndodhi në orët e para të ditës së martë, ka tronditur jo pak vendin. Tronditja erdhi pikërisht për faktin se familja e shënjestrës nuk ka asnjë problem, por edhe për shkak të angazhimit të tij politik. Ndreca është kreu i Partisë Demokratike për gjithë Bashkinë e Vaut të Dejës dhe në prag zgjedhjesh ekziston edhe frika e përplasjeve politike për një nga zonat që pretendohet më të nxehtat në vendin tonë. Shpërthimi i mjetit ndodhi teksa kryedemokrati gjendej në mjet, ndërkohë që nëna e tij ishte në oborr duke i hapur portën e jashtë që i biri të dilte bashkë me mjetin. Pamjet u bënë publike nga vetë familja e Ndrecës, duke dëshmuar një akt terrori të frikshëm mu në oborrin e shtëpisë dhe para syve të nënës së tij.