Kërcënimi për tenderin 1 mln euro në Bashkinë e Tiranës/ Biznesmenit i vunë pistoletën te koka

Zbardhen detaje të reja lidhur me arrestimin e 3 personave në Elbasan, të cilët akuzohen se kanë kërcënuar dhe shantazhuar prej disa kohësh një biznesmen, që ky i fundit të tërhiqej nga një tender që kishte fituar në Bashkinë e Tiranës.

Fituesi i tenderit është Erald Myftaraj, ndërsa ai është shantazhuar nga Algert Alcani, 27 vjeç, Edmir Boci, 37 vjeç, dhe Shaqir Alcani, 62 vjeç.

Mësohet se tenderi në fjalë ishte për lëndë drusore dhe kishte vlerën e 1 milion eurove.

Algert Alcani, babë e bir, janë personat të cilët kishin pajtuar dy persona të tjerë për të kërcënuar biznesmenin Erald Myftaraj që të tërhiqej nga një tender publik që kishte fituar nga Bashkia e Tiranës.

Sakaq mësohet se personat, të cilët janë paguar nga babë e bir, Algert dhe Shaqir Alcani, janë persona me rekorde kriminale dhe me origjinë nga Lezha dhe Burreli. Ndërkohë RENEA ndodhet në terren, me qëllim kapjen e një tjetër shtetasit të shpallur në kërkim, me inicialet L.K..

Sipas hetimeve, të akuzuarit i kanë vendosur pistoletën në kokë administratorit Erald Myftaraj për t’u tërhequr nga tenderi dhe e kanë kërcënuar edhe me jetën e djalit.

Një nga të arrestuarit Shaqir Alcani rezulton pronar i firmës 'Alcani sh.p.k.'. Kjo firmë ka përftuar 28 tendera, 13 prej tyre në Bashkinë e Tiranës. Firma rezulton se kryesisht furnizonte me lëndë djegëse për ngrohje objekte arsimore.

NJOFTIMI ZYRTAR

Specialistët e strukturave hetimore të DVP Elbasan, mbështetur nga inteligjenca informative se disa shtetas kishin kanosur administratorin e një firme në Cërrik dhe vijonin ta shtrëngonin që të tërhiqej nga një procedurë tenderimi që kishte fituar në bashkinë e Tiranës, kanë referuar materialet në Prokurorinë pranë Gjykatës së Rrethit Gjyqësor Elbasan, e cila regjistroi procedimin penal.

Pas një hetimi proaktiv njëmujor, strukturat hetimore të DVP Elbasan, në bashkëpunim me Prokurorinë dhe me mbështetjen e Forcës së Posaçme Operacionale në Policinë e Shtetit, organizuan dhe finalizuan operacionin policor të koduar “Tenderi”.

Në kuadër të këtij operacioni u kapën dhe u ndaluan shtetasit: E. B., 37 vjeç, A. A. 27 vjeç dhe Sh. A., 62 vjeç, tre banues në Tiranë, si dhe u shpall në kërkim shtetasi L.K., 38 vjeç, për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.

Këta shtetas, në bashkëpunim me njëri-tjetrin, kanë shtrënguar me anë të kanosjes, shtetasin E. M., administrator i një biznesi me qendër në Cerrik, Elbasan, duke i kërkuar që të tërhiqej nga një procedurë konkurrimi (tender publik), e fituar në Bashkinë e Tiranës, nga firma e që ai administronte. Shtetasi E. M. nuk ka pranuar të tërhiqet dhe këta shtetas e kanë kërcënuar se do të vrisnin atë dhe familjarët e tij.

U sekuestruan në cilësinë e provës materiale automjeti i përdorur nga autorët dhe 8 aparate celulare. Materiale procedurale i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.