Kaprata: Veliaj u mbështet te populizmi, fasadizmi, demagogjia dhe terrori policor për të qeverisur Tiranën

I ftuar në edicionin e pasdites në Syri Tv me moderatoren Armela Ferko ishte urbanisti dhe pedagogu Gent Kaprata.

Kaprata foli për mungesën e projekteve efikase të urbanizimit që do të sillnin një standard më të lartë për jetën e qytetarëve, ndërsa theksoi se projekti i mbjelljes së pemëve në një trotuar 80 cm është qesharak.

"Duhet të kuptojmë që qeverisja e Veliaj në Tiranë është një shtojcë e qeverisjes kryesore të rilindjes, kjo e parë në karakteristikat e populizmit, fasadizmi, demagogjia dhe policia. Këto ishin aspektet që e kanë shoqëruar Veliajn në këto 8 vite.

Nuk do ta quaj veçanti, por ajo që e shoqëron më shumë Veliajn në këto vite ishte në vend se të kthehej një kryetar që shikon të ardhmen, u kthye në legalizues i gjendjes ekzistues, ai i thelloi anët më negative të asaj gjendje.

Gjithë punët e Veliajt kanë një të përbashkët duke dhënë një produkt minimalist në impaktin e qytetit në krahasim të shumës 1 miliardë euro që ka shpenzuar bashkia në këto 8 vite.

Ky grup i punës nuk është e vërtetë që kanë impakt, por janë bërë që të tërheqin vëmendjen e publikut se ja ne po punojmë, kjo duke parë që ngulen fidanë dhe pemë në një trotuar që është rreth 80 cm i gjerë.

Urbanistika nuk shikohet me numër pemësh, ajo nis nga njeriu dhe qeliza më e vogël e projektimit dhe menaxhimit urban nis nga ajo që quhet kompleks i banimit. Një kompleks banimi ndërtohet për 4 mijë banorë dhe për çdo element të atij kompleksi ndërtimi përkthehet në metra katror për banorë, dhe në bazë të asaj projektohen dhe hapësirat e gjelbërta dhe jo të mbjellësh pemë në mënyrë të çthurur."