EURO 2024/ Silvinjo vjen me ndryshime në skemë, ja si pritet të rreshtohet Shqipëria ndaj Polonisë

Kombëtarja shqiptare nis sot rrugëtimin drejt EURO 2024, teksa ditën e sotme do të përballet me Poloninë në Varshavë.

Ndryshe nga Edi Reja (3-5-2), trajneri i ri Silvinjo do të aplikojë skemën e re 4-3-3, ku në katërkëndëshin e portës do të jetë Thomas Strakosha, i cili ka lënë pas problemet muskulore dhe ka fituar vendin e titullarit. Në qendër të mbrojtjes do të pozicionohen Marash Kumbulla dhe Enea Mihaj (Veseli). Ndërsa nga krahët do të luajnë Elseid Hysaj dhe Ivan Balliu.

Në qendër të mesfushës si titullar do të pozicionohet Ylber Ramadani. Përkrah lojtarit të Aberdeen do të pozicionohen Kristjan Asllani dhe Qazim Laçi. Në sulm konfirmohet i përhershmi Sokol Cikalleshi. Kavajasi do të mbështetet nga krahët nga Jasir Asani dhe Myrto Uzuni. Futbollisti i Gwangju do të debutojë si titullar me Kombëtaren shqiptare pas formës të mirë të shfaqur në Korenë e Jugut.

Ndërsa Uzuni ka lënë pas problemet muskulore dhe është gati për të dhënë më të mirën përballë Polonisë. Sulmuesi beratas vjen në një formë fantastike, pasi numëron 20 gola me Granadën në La Liga 2.

Grupi është i plotë, ndërsa trajneri Sylvinho mund të mbështetet në pankinë, aty ku ka emra si Bajrami, Mehmeti, Gjasula dhe Seferi, të gatshëm për të dhënë kontributin e tyre gjatë ndeshjes. Poloni-Shqipëri do të startojë në orën 20:45.