Zbulohen detaje për takimet e ndara të Borell me Kurtin e Vuçiq

 

Klan Kosova duke cituar burime raporton se kryediplomati evropian, Josep Borell do të takojë takime të ndara me të dy liderët nga ora 10:00, ndërkaq më vonë, do ta mbahet takimi Kuti-Vuçiq.

 

Ndërkohë, ky takim do të ketë në fokus finalizimin e Aneksit për Zbatimin e Marrëveshjes bazë për normalizimin e marrëdhënieve mes dy vendeve.

 

Ndërkaq, në takimin e 27 shkurtit në Bruksel, të dyja palët u pajtuan për propozimin evropian, i cili më pas u publikua edhe në faqen zyrtare të BE-së.

 

Kurti po këmbëngul se rreth Asociacionit të komunave me shumicë serbe, apo, siç e quan ai, “Zajednica” flitet në nenin 10 të Planit Evropian, megjithatë, në nenin e shtatë të marrëveshjes, e cila tashmë është publikuar në faqen zyrtare të BE-së, përmendet një “nivel i duhur i vetëmenaxhimit për komunitetin serb në Kosovë”.

 

“Të dyja palët angazhohen të krijojnë marrëveshje dhe garanci specifike, në përputhje me instrumentet përkatëse të Këshillit të Evropës dhe duke u mbështetur në përvojat ekzistuese evropiane, për të siguruar një nivel të duhur të vetë-menaxhimit për komunitetin serb në Kosovë dhe aftësinë për ofrimin e shërbimeve në fusha specifike, duke përfshirë mundësinë e mbështetjes financiare nga Serbia dhe një kanal të drejtpërdrejtë komunikimi për komunitetin serb me Qeverinë e Kosovës”– thuhet mes tjerash në nenin e shtatë.

 

Kurti, në këtë paraqitje të tij para medieve, foli për Asociacionin duke thënë se kjo çështje është “në nenin 10 në një prej 33 marrëveshjeve”.

 

Ndërkaq pika 10 e propozimit evropian thotë si vijon: “Palët do të krijojnë një Komitet të përbashkët, të kryesuar nga BE-ja, për monitorimin e zbatimit të kësaj Marrëveshjeje. Të dyja palët konfirmojnë detyrimin e tyre për të zbatuar të gjitha marrëveshjet e kaluara të Dialogut, të cilat mbeten të vlefshme dhe detyruese”.