Sonte stuhi në det, ndalohet nisja e trageteve nga Durrësi drejt Barit dhe anasjelltas

Drejtoria e Përgjithshme Detare paralajmëroi se duke filluar nga mbrëmja e së mërkurës, 15 mars deri më 17 mars, do të ketë një përkeqësim të motit që do të shkaktojë stuhi në det. Si rrjedhim, sot, të mërkurën, tragetet nuk do të nisen nga Porti i Durrësit drejt Barit në Itali dhe anasjelltas.

Në datat 15-16 mars 2023 moti do të përkeqësohet duke filluar nga ora 22:00 e datës 15 mars, thuhet në njoftim. - Era do të jetë në drejtimin veriperëndim - verilindje në forcën e detit deri 5-7 bft me shpejtësi ere deri 15-25 m/s dhe lartësi dallge deri 2.00 -2.50 m.

Për shkak të përkeqësimit të kushteve atmosferike, ditën e sotme nuk do të ketë nisje të trageteve nga Porti i Durrësit drejt Barit dhe anasjelltas.

Kompanitë e lundrimeve do të respektojnë gjithë detyrimet që lindin nga ky anulimi i lundrimit, ndërsa për çdo sqarim të nevojshëm, ju ftojmë të kontaktoni me agjencitë respektive.

Mjetet e vogla lundruese dhe ato te peshkimit do të pezullohen deri ne përmirësimin e kushteve hidrometeorologjike.

Përmirësimi i situatës hidrometeorologjike të përkeqësuar për mjetet e vogla lundruese dhe të peshkimit do të jetë mbas datës 17 mars 2023, ora 6:00.

Me qëllim parandalimin e çdo situate të papritur për shkak të kushteve atmosferike kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gatishmërisë së ekuipazhit në mjetet lundruese."

Moti i keq, Kapiteneria e Vlorës pezullon daljen e peshkarexhave, jo të anijeve të transportit ndërkombëtar

Edhe kapiteneria e Vlorës njofton për pezullimin e lundrimit të anijeve të vogla në det duke filluar nga mbrëmja e sotme deri më datë 17 mars për shkak të përkeqësimit të motit gjatë natës.

Në njoftimin e lëshuar të mërkurën thuhet: “Në bazë të parashikimit për situatën hidrometeorologjike të përkeqësuar në gjirin e Vlorës dhe jashtë saj gjatë datës 16-17 mars 2023 duke filluar nga ora 22.00 datë 15 mars në drejtimin veri-veriperëndim dhe verilindje në forcën deri 5-6 bft me shpejtësi ere deri 15m/s, dhe lartësi dallge deri 2.00m brenda Gjirit të Vlorës dhe jashtë Gjirit të Vlorës në forcën 6-7 bft me shpejtësi ere deri 25m/s dhe lartësi dallge nga 1.50 deri 2.50 metra, mjetet e vogla lundruese dhe ato të peshkimit do të pezullohen deri në përmirësimin e kushteve hidrometeorologjike.

Anijet e transportit ndërkombëtar detar do të vazhdojnë të operojnë normalisht sipas destinacioneve.

Përmirësimi i situatës hidrometeorologjike të përkeqësuar në Gjirin e Vlorës dhe jashtë saj për mjetet e vogla lundruese dhe të peshkimit do të jetë mbas datës 17 mars 2023 ora 6:00.”