Një muaj pas tërmetit, të mbijetuarit kanë nevojë për strehim, kanalizime

Ankara, Turqi - Një muaj pas një tërmeti të fuqishëm që shkatërroi pjesë të Turqisë dhe Sirisë, qindra mijëra njerëz kanë ende nevojë për strehim dhe kanalizime dhe një apel për 1 miliard dollarë për të ndihmuar të mbijetuarit është financuar deri në 10%, duke penguar përpjekjet për të trajtuar krizën humanitare, tha të hënën një zyrtar i Kombeve të Bashkuara.

Tërmeti i 6 shkurtit dhe pasgoditjet e forta kanë vrarë rreth 47,000 njerëz në Turqi, kanë shkatërruar ose dëmtuar rreth 214,000 ndërtesa dhe kanë lënë qindra mijëra njerëz të pastrehë, duke e bërë atë fatkeqësinë më të hidhur në historinë moderne të Turqisë.

OKB vlerëson se tërmeti vrau rreth 6,000 njerëz në Siri, kryesisht në veriperëndimin e kontrolluar nga rebelët.

Afro 2 milionë të mbijetuar janë evakuuar nga rajoni i shkatërruar nga tërmeti, sipas shifrave të qeverisë turke. Më shumë se 1.4 milionë njerëz janë vendosur në tenda ndërsa 46,000 të tjerë janë zhvendosur në shtëpi me kontejnerë. Të tjerët jetojnë në konvikte dhe bujtina, tha qeveria.

“Duke pasur parasysh numrin e njerëzve që janë zhvendosur, duke pasur parasysh numrin e njerëzve që janë lënduar dhe duke pasur parasysh nivelin e shkatërrimit, ne kemi nevoja të gjera humanitare tani,” Alvaro Rodriguez, Koordinatori i Përhershëm i Kombeve të Bashkuara në Turqi. tha për Associated Press.