Sirena e Vogël në Danimarkë vandalizohet me ngjyrat e flamurit rus

Policia e Kopenhagenit nisi hetimet për prishjen e statujës që shihet si mbështetje për Moskën në luftën në Ukrainë.

Statuja e Sirenës së Vogël në Kopenhagë, një nga monumentet më të shquara të Danimarkës, është vandalizuar me një flamur rus të pikturuar në bazën e saj.

Ngjyrat e flamurit të kuq, të bardhë dhe blu u lyen gjatë natës së të enjtes mbi shkëmbin mbi të cilin qëndron statuja e heroinës nga përralla e Hans Christian Andersen.

Policia e Kopenhagenit tha se kishte shkuar në vendngjarje dhe kishte regjistruar "një rast dhunimi" dhe se ata po përpiqeshin të gjenin "gjurmë" në zonë.

Një hetim është hapur për aktin që shihet si një shenjë mbështetjeje për Moskën në luftën në Ukrainë.

Statuja, e cila ndodhet në portin relativisht të izoluar të Langelinie në Kopenhagen, është vandalizuar shumë herë. Koka e sirenës u vodh në vitin 1964 dhe krahu i prerë në vitin 1984. Në vitin 1998, vandalët ia hoqën përsëri kokën, por më vonë ajo u kthye, përpara se statuja të hidhej në erë në 2003.

Statuja është etiketuar dhe pikturuar shumë herë, së fundmi në vitin 2020 me mbishkrimin misterioz "peshk racist".