Ideja e monedhës së përbashkët Brazil-Argjentinë shihet me dyshime

Një propozim i paraqitur nga liderët e Brazilit dhe Argjentinës për të krijuar një monedhë të përbashkët po përballet me skepticizëm të thellë nga analistët, të cilët thonë se asnjë vend nuk është i pozicionuar për të trajtuar një sipërmarrje kaq të ndërlikuar ose për të ngjallur besim me këtë ide me tregjet globale.

Por presidenti i Brazilit Luiz Inácio Lula da Silva u tha gazetarëve të hënën se një monedhë e përbashkët do të reduktonte një varësi të dëmshme nga dollari amerikan, njofton Euronews.

"Unë mendoj se kjo do të ndodhë me kalimin e kohës dhe është e nevojshme sepse ka vende që ndonjëherë kanë vështirësi për të blerë dollarë," tha Lula në Buenos Aires pas takimit me homologun e tij argjentinas, Alberto Fernández.

 “Ne nuk duhet të vazhdojmë në shekullin 21 të bëjmë të njëjtën gjë si në shekullin e 20-të.”

Lula shpjegoi se monedha fillimisht do të ndahej midis Argjentinës dhe Brazilit për tregtinë dhe transaksionet midis dy vendeve dhe më vonë do të miratohej nga anëtarët e tjerë të bllokut tregtar Mercosur.

 Detajet mbetën të paqarta një ditë pasi Lula dhe Fernández e bënë të ditur skicën në një deklaratë të përbashkët të botuar të dielën në gazetën argjentinase Perfil.

Duke folur në Buenos Aires të hënën pasdite, Ministri i Financave i Brazilit Fernando Haddad sqaroi se propozimi nuk do të kërkonte miratimin e një monedhe të vetme për të zëvendësuar realin brazilian dhe peson argjentinas.

Ekonomistët vunë menjëherë në dyshim logjikën e planit mes fqinjëve të Amerikës së Jugut. Kushtet ekonomike po përkeqësohen në Argjentinë, ku gati katër në 10 njerëz jetojnë në varfëri. Vendi ka një nga normat më të larta të inflacionit në botë - 95% në 2022 - dhe peso e tij është zhvlerësuar në mënyrë të vazhdueshme për më shumë se një dekadë.